❞ ‫ـ قال الحكيم قاقمنا:«لا تحكم في قضية حتى تسمع الطرفين»! ❝

وأنا بقول للحكيم نفسه … لا تحكم من غير ما تسمع من جميع الاطراف مش كفاية طرفين …

جربت تدور على الحقيقة وتحاول توصلها بالرغم من ان كل حاجة حواليك بتشدك وتقيدك وتلجمك انك ما توصلش …

جربت تآمن بحلمك ..

طيب جربت تسعى وتدور عليه..

جربت تحارب لوحدك ..

أصل احنا اتربينا على أن اللى نعرفه احسن من اللى منعرفهوش …

وان آخرة الفضول وحشة ..

القصة مختلفة هنا 👈🏻

ديه قصة إخناتون اللى قرر يحارب امبراطورية كاملة واسرة ملكية وكهنة فى سبيل اقتناعه وتوحيده بإله واحد

‎❞ إني المؤمن الوحيد في بلد من الضالين. ❝

❞ كان يعيش في رحاب الإله ويصدع بأمره، ولا يبالي بعد ذلك بما يحيق به، إذ كيف يمكن لمن ينغمس في الحقيقة أن يكترث لمكر الساسة ودهاء العسكريين؟! وقد رموه بالخيال والحُلم والجنون، فكان هو العائش في الحقيقة، وكانوا هم الخياليين الحالمين المجانين الغارقين في أوهام الدنيا الفاسدة. ❝

فى 1️⃣7️⃣9️⃣ صفحة .. هتعيش فى بلاد طيبة فى حكم الملك تحتمس الثالث وزوجته تيي …هتتخيل نظام الحكم وكهنة آمون … هتحس أنك داخل معابدهم وشايف المشاهد ولا كأنك فى عرض مسرحى 🎭

متخيل ازياءهم 👘👑وحركاتهم وطريقة كلامهم 🗣…

بس الفكرة مش فى مجرد سرد فترة زمنية لحكم الملك 🤴🏼 تحتمس الثالث والاسرة الحاكمة ونظامه لااااا

الفكرة 💭 بدأت بشخصية ابتكرها نجيب محفوظ

شخصية ولد 👦🏼 بيدور عن الحقيقة ورا حياة 👑 " إخناتون "

❞ اخترت سبيلك بنفسك يا مري مون فاذهب في رعاية الآلهة.. أجدادك ذهبوا للحرب أو السياسة أو التجارة، أما أنت فتريد الحقيقة، وكل على قدر همته، ولكن احذر أن تستفز صاحب سلطان أو تشمت بساقط في النسيان! كن كالتاريخ يفتح أذنيه لكل قائل ولا ينحاز لأحد ثم يسلم الحقيقة ناصعة هبة للمتأملين.. ❝

قرر والد الولد ده انه يخليه يبحث عن الحقيقة بنفسه مسمعهوش كلام انشاء زى ما بنقول واقعده جنبه على المصطبة قدام المعبد 🏛 وقت العصرية 🌞

واكل ودنه 👂🏻و هو بيحكيله 🗣من وجهة نظره تاريخ الاسرة الحاكمة 👑 ومنسيش يحط التاتش 👣 بتاعه 😃….

لا بالعكس 🔄 قاله روح 🏃🏼بنفسك خالط الناس اللى كانوا حوالين الملك واسمع من كل واحد قصته ورأيه …

فى حفظ الله يلا موبيلات بقى 📲😂

هيقابل شخصيات كتير منهم القريب والغريب

الأم الملكة تيي 👸…

شخصية قوية مسيطرة

“كانت ملمة بكل صغيرة وكبيرة من شئون مصر أو الإمبراطورية، ولا أنكر إخلاصها وبُعد نظرها وحرصها على المجد والعظمة، ولكني آخذ عليها نهمها للسلطة، ذلك النهم الذي سول لها أن تستغل الدين بنعومة ودهاء لتستأثر بالقوة للعرش دون الكهنة أجمعين”.

بس مش مع ولادها زى حالنا كلنا بنضعف قدام رغباتهم وطلباتهم وبالرغم انها كانت شايفة أن اللى بيعمله اخناتون هيجيب الخراب على مصر 🇪🇬 من وجهة نظرها طبعا وهيقلب الآلهة عليهم إلا أنها سابته يقرر ويستقل بحياته فى " أخت آتون " العاصمة الجديدة 😀

❞ واشتد التوتر في طيبة وانقسم الناس بين الولاء لآمون والولاء للمجنون سليل أعظم أسرة في تاريخنا المجيد. وجزعت الملكة الوالدة تيي وهي ترى غرس يديها وهو يتحول إلى نبات سام، وهو ينحدر نحو الهاوية جارا معه أسرته إلى الفناء. وواظبتْ على زيارة معبد آمون وتقديم القرابين محاولة تلطيف موجة التمرد العارمة التي تهدد باقتلاع العرش"

مش بس الملكة تيي والدة الملك بس اللى هيقابلها الولد ويسمع منها لاااا ده هيقابل كمان

اصحابه ومنهم قائد 🎖الجيش 🐎"حور محب " وصديقه الصدوق 👬

ويعرف هيفضل محافظ على ولاءه وعهده مع الملك ولا هيبعه ويخاف من غضب الكهنة والآلهة

❞ مولاي، لِمَ لا تلجأ إلى القوة دفاعا عن الحب والسلام؟

‫فقال لي باسما:

‫ـ لا يتردد المجرمون عن انتحال الأعذار لإشباع الرغبة الآثمة في البطش وسفك الدماء، ولست منهم ❝

واكيد هيقابل زوجته الملكة " نفرتيتى" 👸

ويتعرف على كواليس زواجهم وهل اتجوزته عن حب ولا صالونات 😄

هيلف لفة من الآخر على معبد معبد ويعرف تفاصيل واراء الناس فى الملك علشان يوصل للحقيقة بعد ما يجمع كل الملفات عنه 💿 ويحكم هو بنفسه …

أول تجربة ليا مع نوعية الروايات التاريخية للكاتب نجيب محفوظ …

قصة حياة ملك فريد من نوعه من وجهة نظرى فى عصره … بالرغم من لين قلبه اللى كانوا شايفينه ضعف منه إلا أنه استقل عن الاسرة وابدا رأيه ومشى ورا حلمه وايمانه ومخافش انه يواجه …

❞ لا كرامة لعرش يقوم على الكذب والفجور ❝

❞ أليس لنا قلوب نميز بها بين الحق والباطل؟ ❝

كان لين قلبه وهيئته وطباعه مطمع لاصحاب النفوس المريضة اللى كانت عايزة توصل للحكم فاستغلوا طيبته للتقرب منه والسيطرة عليه

❞ لقد هرع إليه الرجال لا خوفا من قوته، ولكن طمعا في ضعفه ❝

❞ ان ضعفه الطعم الذي جُذِبَ إليه المنافقون والطماعون واللصوص والفاسقون ❝

طيب بعد المقابلات والحوارات ديه كلها وصلنا يا ترى للحقيقة 🧐🤔

الولد وصل 🏃🏼طيب انا وصلت 🏃‍♀️😄

الحقيقة هتفضل دايما من وجهة نظرى مجهولة بالنسبة للتاريخ لانه دايما بيوصلنا كل راوى حكى من اقتناعه الشخصى واللى سمعه ووصله من ال " عن عن" وده طبعا يحتمل الصواب والخطا

يحتمل المحسوبية واوقات الكره

وده حتى فى حياتنا العامة اصلا 🤷🏼‍♀️

عارف فلان

اه عارفه

طيب عاشرته

لا

يبقى متعرفهوش

🤷🏼‍♀️🤷🏼‍♀️ نفس الشىء

هتسمع التاريخ من فلان وفلان بس الحقيقة فين هنفضل نبحث عنها ويمكن ده يكون سبب فى سعينا … اننا نفضل دايما ندور ومنستسلمش باللى وصلنا ☺️

❞ وها هو ذا الزمن يمضي وأنا أتساءل دائما: أكان مولاي إخناتون يستحق تلك النهاية المحزنة؟ كان النبل والصدق والحب والرحمة فلِمَ لَمْ يبادله الناس نبلا بنبل، وصدقا بصدق، وحبا بحب، ورحمة برحمة؟ لماذا انقضوا عليه كالوحوش يمزقونه، ويمزقون ملكه كأنه عدو أثيم؟! ولقد رأيته في المنام منذ أعوام مطروحا على الأرض والدم ينزف من جرح غائر في عنقه، فاستحوذ عليَّ شعور قوي بأنهم قتلوه قتلا مدعين كذبا أنه مات ميتة طبيعية.

‫وسكتت وهي تنظر فيما أمامها بأسى، ثم تمتمت:

‫ـ لقد عاشرنا رجلا لا يتكرر. ❝