لا تسألْني إن كانَ القُرآنْ
مخلوقاً.. أو أزَليّ.
بل سَلْني إن كان السُّلطانْ
لِصّاً.. أو نصفَ نبيّ!!"*
ملعون أبو حرية تعبيركم المدعاه على شجاعتكم الفالصو، على لسانكم اللي ما بيطولش غير لما تيجوا تتطاولوا على مقام رب العزة سبحانه وتعالى عما تصفون علواً كبيراً، لكن حاشا لله إنكم تتناولوا سيرة الحاكم الظالم الفاشل القاتل الأحمق المستبد، دي حاجة ما بتثيرش خيالكم ولا بتستفز إبداعكم على الإطلاق، معلش ما هو أصل الحاكم زعله وحش وإيده تقيلة وما بيمهلش زي رب العزة.
وبالمناسبة يا دار الشروق أخبار رواية علاء الأسواني الجديدة اللي رافضين نشرها إيه؟ مش ناويين تاخدوا حبوب الشجاعة وتنشروها هي كمان؟ ولا هي شجاعتكم على قد الإساءة للذات الإلهية بس لكن مع الذات السلطانية طبعاً بيبقى الجبن هو سيد الأخلاق!
بالنسبة لأحمد مراد بقى يا خسارة، كان عندنا كاتب واعد وراح، أنا حزين يا أخي على قدر الحماس اللي تحمسته لك والدفاع اللي دافعته عنك، يللا إلى حيث ألقت!
*من قصيدة "من أوراق أبو نواس" لأمل دنقل.