أول ديوان أقرأه باللهجة العامية.. بسيط للغاية ويتناول قضايا الحياة اليومية
خفيف جداً وخاصة إن استمعت إليه، أنا استمعت إلى هذه الرباعيات بصوت مدحت صالح وكانت جيدة.
مع إن كل الخلق من أصل طين
وكلهم بينزلوا مغمضــــين
بعد الدقايق والشهور والسنين
تلاقي ناس أشرار وناس طيبين
عجبي!!
مرغم عليك يا صبح مغصوب يا ليل
لا دخلتها برجليا ولا كان لي ميل
شايلني شيل دخلت انا في الحياة
وبكره ح اخرج منها شايلني شيل
عجبي!!
وانا في الضلام من غير شعاع يهتكه
أقـف مـكــاني بخوف ولا اتركه
ولما ييجي النور واشوف الدروب
أحتار زيادة .. أيهم اسلكه؟
عجبي!!
ضريح رخام فيه السعيد اندفن
و حفره فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن
عجبي !!
أنا شاب لكن عمري ولا ألف عام
وحيد ولكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!
عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!
أنا قلبي كان شخشيخة أصبح جرس
جلجلت به صحيوا الخدم والحرس
أنا المهرج .. قمتو ليه خفتو ليه؟
لاف ايدي سيف ولا تحت مني فرس
عجبي!!
دخل الربيع يضحك لقاني حزين
نده الربيع على اسمي لم قلت مين
حط الربيع أزهاره جنبي وراح
وايش تعمل الأزهار للميتين
عجبي!!
انا كل يوم أسمع .. فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!
إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
سرداب في مستشفي الولاده طويل
صرخات عذاب ورا كل باب وعويل
.. وفي الطـريق متزوقين البنات
متزوقــــــين للحب و المواويل
عجبي !!
يا طير يا عالي في الســــــما طز فيك
ما تفتكرشي ربنا مصطـــــــــــف
برضـك بتاكل دود و للطين تعود
تمــــــــص فيه يا حلو .. و يمص فيك
عجبي !!
يأسك و صبرك بين إيديك و انت حر
تيأس ما تيأس الحياه راح تــمر
أنا دقت مندا ومندا عجبي لقيـت
الصبر مر و برضك اليـأس مــــر
عجبي !!
عجبي علي العجب العجيب العجاب
لما الحقيقة تطل بعد احتجاب
و تروق و تحلا وفجأة تصبح مفيش
كمثل طراطيش بحر ياما خد و جاب
عجبي