رحلة بحث عن الذات من خلال انعكاس النظرة عن تاريخ الأجداد ..

في البداية استغربت الموضوع جدا وحسيت بملل يمكن بسبب جهلي من البداية بموضوع اخر ذئاب يلوستون .. بس مع الاستمرار في القراية بدات اتعلق بالفكرة وبالشخصيات وخصوصا ليو الاول ..

الرواية ممتعه وفعلا استفدت منها .. كفاية انها عرفتني معلومات جديدة عن مجتمع كامل وتاريخه .. الكاتبة كعادتها طبعا بتتعب فعلا في الرواية وبتحاول توصل اكبر قدر من المعلومات في سياق درامي فانتزيا شوية وده اكتر حاجه بتحببني في كتاباتها .. وتفادت فيها اخطائها -من وجهة نظري- اللي كانت في طغراء .. تفادت المماطله في الاحداث بحيث ان الرواية شملت ٣ اجيال بس وصلتني فكرة متكاملة عن كل جيل وقدرت استنتج المعني والعلاقه بينهم باسلوب ممتع ومشوق ..

تفادت النهاية السطحية .. النهاية هنا جت مناسبة جدا ومنطقية وتخليك تقفل الكتاب وانت في قمة استمتاعك ..

تفادت الموضوع التقليدي يعني رجعت لنفس مستوى صندوق الدمى .. موضوع يقدر يجذب القارئ وحتى لو مستمتعش بالاحداث هيخرج بمعلومة ..

انا فعلا فخورة ان في قلم عندنا في مصر زى شيرين .. وهفضل منتظرة اعمالها عمل ورا التاني ومنتظرة المعلومات النادرة الفريدة اللي بخرج بيها من قرايتي ..