ملحمة الحرافيش | نجيب محفوظ

أول حاجة لازم نعترف بيها ان بمجرد مقارنة بسيطة بين كل الكتاب الحاليين و نجيب محفوظ فهيتضح ان كل الموجودين " بطيخ "

ملحمة الحرافيش بتسرد تاريخ عائلة الناجى تاريخ عشرة أجيال كاملة من الأسرة اللى بدأت بعاشور الناجى و انتهت أيضاً بعاشور الناجى

600 صفحة من الإبداع الفائق للحدود ليه لإن الكاتب بكل بساطة أرخ فيها لوطن كامل و شعب كامل من خياله أرخ لقرون كاملة فى صفحاته

بتبدأ الملحمة بعاشور الجد رمز العدل " لتكن قوتك في خدمة الناس لا الشيطان " بتحكى أسطورته و عهده و هروبه من الوباء و بناءه للحارة من جديد و إختفائه الغامض

بعده أتى شمس الدين فسليمان فخضر مرورا بجلال و سماحة و بكر و رمانة و قرة و وحيد و تستمر الحكايات بتوضح نهاية كل ظالم فى الحارة ولكل فتوة مفترى

فى عائلة الناجى هتلاقى المتدين و الفاجر هتلاقى الغنى و الفقير هتلاقى ذو المكانة و المشرد المطارد هتلاقى العزيز و الذليل الحارة بتتغير فتوات بتمسك السلطة و حاضر بيصبح من الماضى و الحرافيش ثابتين ساكتين راضيين بالواقع آملين فى بعث عاشور الناجى من جديد

الرواية بتتكلم عن حب المال و السلطة و الشهوة عن سعى الإنسان الأذلى فى سبيل السلطة " حبان يشكلان أضعف ما فينا , حب المال و حب السيطرة على العباد .. "

الرواية دى تعتبر تلخيص موجز لثورتنا رحمها الله و بالأخص فى الحكاية التاسعة و ثورة الحرافيش و وصول فتح الباب لمنصب الفتوة و حكمه بالعدل و توزيعه الثروة على الكل بس ده معجبش وجهاء الحارة و أتباع الفتوة القديم اللى واجهوا التغير بالمهادنة و إقناع فتح الباب ان الامور تأتى بالتدريج حتى إطمأنوا لعودة الحرافيش لسابق عهدهم من الإستكانة لهم و عزلوا فتح الباب فى داره حتى وجد الناس جثته ملقاة فى قارعة الطريق و عاد رجال الفتوة لسابق عهدهم من البطش و الظلم

ختاماً الرواية دى تتوصف بجملة واحدة بس " لو لم يكتب محفوظ غيرها لكفته "