في البداية كنت مترددة بين تلات وأربع نجوم بس قررت أديها أربعة لأني أقرب للتلاتة ونص .. الرواية في المجمل عجبتني وأسلوب شيرين برضه معقول جداً وأفضل كتير من "نيكروفيليا". الفكرة اللي مبنية عليها الرواية حلوة، بس في رأيي الحبكة جت ساذجة شوية في "بعض" الأجزاء.
أنا خدت انطباع ان شيرين شافت سلسلة "أرايفالز" واقتنعت بيها فقررت تحط أفكارها في رواية عشان توصل لأكبر عدد من الناس، المشكلة إن فيه صفحات كاملة كانت مجرد عرض مباشر لأفكارها وأرائها، وده بالنسبة لي مش وحش، لكن فيه ناس مش بتحب أراء مباشرة كده في رواية. حاجة تانية مكنش المفروض تفسر العنوان بشكل مباشر كده في أول ستين صفحة. كانت سابتنا نفكر شوية. الجزء الأول فكرته حلوة ومتأثرة فيه بد/ أحمد خالد توفيق بشكل واضح. أخيراً المواجهة الأخيرة دي معجبتنيش قوي ويمكن هي السبب اني كنت عايزة أديها تلات نجوم لكن ده مقللش من مجمل الرواية .