طبعا مش محتاج اتكلم على عمر طاهر ككاتب ساخر لانه غنى عن التقديم و الكلام عليه و بالنسبة للكتاب هو كتاب جميل فى مجمله و هو عبارة عن مقالات مجمعة و فيها مقالات بالنسبة ليا مضفتليش حاجة ولا حتى ابتسامة و مقالات تانية ضحكتنى جدا .. المهم انا ليا كام ملاحظة على الكتاب اولهم تخص مقال "المدد" و المقال دا باختصار بيتكلم عن حركة تعيين فى جريدة الأهرام تجاوزت عمر طاهر و كان فيه شيخ صوفى عمر طاهر على علاقة بيه و قاله سيدنا الحسين هيعينك و بتاع المهم فى الاخر اتعين و الناس قالتله دا سيدنا الحسين عينيك و بتاع الفكرة فى المقال دا انه يتفق نسبيا مع نقطة طلب المدد من ال البيت و لو هو كدا و الكاتب مقتنع بيه يبقى ربنا دوره ايه فى حياتنا لما الناس بتطلب المدد من ال البيت ؟!! ... بالنسبة للنقطة التانية و التالتة فهما غلطات فى المعلومات العامة و انا مستغرب جدا ان الغلطات دى موجودة فى الطبعة الرابعة (النسخة اللى انا كنت بقرئها) أما بالنسبة للنقطة التانية فهى تخص مقال "حصة تاريخ" و الغلطة اللى وقع فيها الكاتب غير متوقعة منه بالمرة و هى فى الفقرة الخامسة و الكاتب كان بيتكلم عن الاحداث اللى حصلت فى تاريخ 5 يونيو و كما كتب الكاتب "و هو التاريخ الذى حضر فيه السادات الى البرلمان ليعلن قبوله قرار المجلس ترشيحه رئيسا للبلاد (70) و كان أول قرار صدق عليه هو قبول هيكل استقالة هيكل من منصبه كوزير للارشاد القومى و هو التاريخ الذى اغتيل فيه فى 81" .. بالنسبة للنقطة دى اللى فهمته منها ان الضمير هو اللى موجود فى اخر جملة عائد على السادات و دى غلطة فادحة انه يكتب التاريخ 5 يونيو تاريخ اغتيال السادات و لكن فيه احتمال تانى انه كان يقصد بيه هيكل و اكيد مش دكتور محمد حسنين هيكل و انا دورت على تاريخ وزارة الارشاد القومى اللى هى دلوقتى وزارة الثقافة و ملقتش رئيس ليها اسمه هيكل و ايضا بحثت عن جميع الاغتيالات التى تمت فى مصر عام 1981 حتى لا اظلم الكاتب و لم اجد الا اغتيال السادات مما يعطى الاغلبية انه كان يقصد السادات ... أما النقطة الثالثة فهى تخص مقال "أبو إصبع" فالغطلة ايضا فى الفقرة الخامسة و فى اخرها كتب الكاتب "و اتوقع ان يعاقبه بيل جيتس باغلاق حسابه على الفيس بوك حتى نهاية موسم التزاوج" و طبعا كلنا عارفين الغطلة فين !! ان بيل جيتس مالوش علاقة بالفيس بوك !!