فى العادى مش بحب أكتب الريفيو أول ما أخلص الكتاب
بحب أخد هدنة مع نفسى كده لحد ما استوعبة وبعدين أقول رأيى.
بس هنا الموضوع مختلف كلياً حقيقى !
أحمد مراد قدر يخلينى اغير من عادتى فى...
إنى أصلاً مش بخاف .. وإنى بقرأ دايماً بليل
ودول الحاجتين اللى الحمدالله ربنا يعوض عليا فيهم بقى :D
بداية الرواية خلصت منى فى يومين وده مختلف بالنسبالى نظراً لحجمها و لأنى بقالى فترة مش بعمل كده
وده بيدينى معنى واحد إنى فعلاً حبيتها !
الحبكة فيها رائعة بجد
فكرة المرض النفسى أصلاً بتجذبنى بدون إستئذان
من بداية الرواية ماشية بإنتظام فـ مع كل جزء فية حاجة جديدة تشدك وتخليك تحط فى دماغك ألف أحتمال وأحتمال
بتدخل فى متاهه بس كأنك على باب الرواية أستلمت الكتالوج بتاعها
بالرغم من التفاصيل الكتيرة أنت بردو قادر تتابع كل اللى بيتوصف حتى لو كان بصورة فانتازية شوية
أما بالنسبة للنهاية
فـ هى "بالنسبالى" ممتعة جداً
بالرغم من إنى مابحبش النهايات المفتوحة بتاتاً مطلقاً
نهاية غيرى ممكن يشوفها فصلت اصلاً الواحد عن الرواية
نهاية ساذجة بعد كل الحبكة دى
بس أنا شايفة إنها نهاية تخليك تفكر
وبعدين استمتاعى بالرواية ككل خلانى قادرة استمتع بالنهاية ومش اخليها تفصلنى
وارد أكون شايفة النهاية بطريقة مختلفة عن حد تانى شايفها بطريقة غيرى
ودى الفكرة .. كل واحد بيشوف النهاية بالطريقة اللى عاقلة قادر يوصلها بيتهيالى دى حاجة ممتعة وفى صالح الرواية بالرغم من الجدل اللى حواليها
نيجى بقى للسلبيات واللى خلتنى اشيل نجمة من التقييم ولو ينفع اشيل نص كمان معاها هشيل
1-مش قادر أستوعب إن 5 سنين كده من حياة يحيى واللى كان ليهم تأثير كبير جداً جداً على تفاصيل الرواية مفيش أى تلميح عنهم غير إنه كان لوحدة وبيشرب خمرة ومخدرات ومع مايا وبس !!
2- بمناسبة مايا اللى اتحدفت من شباك بيتة وعادى كدة !! ولا كأنها كانت عندة ولا ده بيتة ولا كأن لية أى علاقة بالموضوع والموضع يمر مرور الكرام بالشكل ده !! مش قادرة استوعبها دى
3- فكرك أنت لو شلت اسماء أنواع الخمور و طريقة شربها والمخدرات أنا كقارئ هتأثر؟؟ طب وربنا لا
أية الأستفادة إن يكون مذكور انواع الخمور بالكترة دى وطريقة تحضير البعض منها و لا كأنه درس !!
4- مش حبيت وجود كلمات إنجليزى كتير .. ماحستهاش ضرورية إلا فى اسماء الأمراض النفسية
5- مستغربة عدم لجوء يحيى للدين مثلاً لما عرف إن الموضوع فية جن وعفريت واستخدم الأرقام بس ... عدم وجود الدين ووجود بعض الألفاظ المقتبسة من القرآن الكريم شئ يثير الشك
الشك في اية؟ شئ فى نفس يعقوب :)))
6- بعض الوصف والايحاءات اللى مازالت بتضايقنى من وقت تراب الماس واللى اعتقد إنها من ضمن اسلوب أحمد مراد
بمناسبة تراب الماس لو هقارن بينهم
يبقى أحمد مرات أفضل بكتيييير فى الفيل الأزرق عن تراب الماس
مش بتكلم عن الموضوع نفسة ولو أنه فعلاً أفضل
لكن باين جداً فى أختيارات الفاظة و وصفة الدقيق والتشبيهات الرائعة واللى ماكنتش موجودة فى تراب الماس
أنا كـ دينا سعيدة بالـ 28 جنية اللى دفعتهم فى الرواية وعليهم أمضاء أحمد مراد كمان :D