الفيل الأزرق > مراجعات رواية الفيل الأزرق > مراجعة Samar Abd-Allah

الفيل الأزرق - أحمد مراد
تحميل الكتاب

الفيل الأزرق

تأليف (تأليف) 3.7
تحميل الكتاب
هل قرأت الكتاب؟
  • قرأته
  • أقرؤه

    الى أين وصلت في القراءة؟

  • سأقرؤه

    هل بدأت بالقراءة؟نعم


لا يوجد صوره
3

شىء مؤسف الحقيقة ان رواية تبتدى بالقوة و التماسك ده لحد ما بعد نصها بشوية وبعدين يتقلب الموضوع تماما وتبقى حبكة غريبة عجيبة خزعبلية!

فى اول مرة قراية خلصت 250 صفحة بمنتهى الاستمتاع و كانت تستاهل اربع الى خمس نجوم ببساطة، وعشان كده اديتها 3 نجوم بدل 2 لانها فى النص التانى الحقيقة بقت اوكى مش اكتر...

خلينى اقول الايجابيات فى الاول، احمد مراد كاتب واعد و ليه مستقبل لو فضل كده-حقيقة معروفة من ساعة تراب الماس-.. اولا عاجبنى اختياره للموضوعات الشيقة، حلو انك من وقت لاخر تقرا ثريلرز وتكون عربية، مش عندنا الموضوع ده كتير بما اننا اساتذة دراما وكوميديا فى الاساس، يمكن نفتقر لﻷكشن -رغم ان حياتنا فيها اكشن كتير- المهم ان مراد رائع فى السسبنس والاكشن ،بيخلى القارئ متحفز يكمل قراية عشان يعرف ايه اللى هيحصل بعد كده و ازاى الموضوع هيتطور .. حصلتلى فى ال3 روايات بتاعته، رغم انهم كبار نسبيا لكن بيخلصوا فى وقت قياسى من الحماسة...

تانى حاجة بتعجبنى فى مراد هو انه بيطور نفسه و بيتحسن فى كل رواية جديدة عن الرواية اللى قبلها، صدمنى فى فيرتيجو ركاكة اللغة عند مراد لكن اتحسن كتير فى تراب الماس و اتحسن اكتر فى الفيل اﻷزرق، كان ليه جمل و توصيف رائع و ظريف و مكتوب بلغة سليمة وان كان فى حاجات واقعة بس قشطة مأثرتش على السياق العام...

من اكبر مميزات مراد بقى هو المجهود الواضح والملحوظ فى رواياته و حرصه الشديييييييد على ان كل حاجة تكون واقعية تماما من اسماء الاماكن لردود فعل اﻷشخاص لﻷحداث لكل التفاصيل سواء ادوية مخدرات خمور تاريخ دكاترة عباسية 8 غرب كل حاجة..

العبرة مش انك تطلع بأفكار مثيرة و غير تقليدية -حادثة القتل فى بار فيرتيجو، تراب الماس فى الرواية ، العباسية والعفاريت فى الفيل اﻷزرق- العبرة انك تقدر تكتب عنهم بواقعية وتحبك حواليهم قصة مثيرة و تتصدق، ﻷ حقيقى شابو لمراد على المجهود المبذول الواضح فى رواياته اللى واضح فيها انه درس وقرا كتير قبل ما يكتب احتراما لعقل القارئ بتاعه، شابو...

بعد الرواية الثالثة لمراد، لقيت انه مش غريب اطلاقا ان صنع الله ابراهيم يشيد بيه فى فيرتيجو، تأثير صنع الله واضح تماما فى اسلوب مراد، طريقة الحكى التفصيلية هى نفس طريقة صنع الله، فيه تشابه واضح لكن مش تطابق اكيد، لاحظته بما انى بقرا فى نفس الوقت رواية "شرف" لصنع الله، استمتعت باﻷسلوب عند الكاتبين..

كل مميزات مراد اللى ذكرتها كانت متجلية فى النص اﻷول من الرواية بس بدات تقل مع النص التانى لما لقيت الموضوع دخل فى عالم اخر مثير برضه لكن يبقى غيبى ومش مصدقاه اوى، كان نفسى يكمل الموضوع فى العباسية و التحليل النفسى و العقلى لمريضه ﻷن عالم العباسية نفسه عالم مثير وبدا لى مراد قادر تماما على كتابة قصة وحوار ذكى بين الطبيب والمريض ، لكن مراد احبطنى مع اﻷسف ومكملش فى الاتجاه ده و اخد منحى اخر...

الرواية مادة غنية جدا لفيلم ينفع يكون فيلم رعب، المنتج الذكى يلحق يشترى الرواية بسرعة، نتمنى ميكونش المنتج الذكى ده هو السبكى...

فى سلسلة اعمال مراد، تبقى "تراب الماس" هى اﻷفضل من حيث الفكرة و اﻷحداث والمجهود المبذول و اﻷكشن القوى اللى فيها ، ده يذكرنى انى لازم اكتب ريفيو عن تراب الماس..

فى انتظار عمل احمد مراد القادم بمنتهى الحماس والترقب..

Facebook Twitter Link .
3 يوافقون
2 تعليقات