الرواية جبتها بعد يوم واحد من صدورها .. كنت بالصدفة في القاهرة و كنت في سيتي ستارز سألت عليها قالولي لسه ما نزلتش بعدها وانا بالف في سيتي ستارز لقيتها في مكتبة فكرة :)

المهم ..

الرواية قريت 70% تقريبا علي مرة واحدة و وقفت لإني كنت تعبت .. لولا كده لكنت كملتها كلها مرة واحدة :)

الرواية مشوقة بدرجة مرعبة !! انت مش بتحس بنفسك و انت بتقراها !!

بتحس إنك بتجري جري فيها .. نفسك تفهم إيه اللي بيحصل .. رواية بتستفزك إنك تكملها :)

الأحداث كتيرة جدا و سريعة .. لسه بتحاول تستوعب اللي بيحصل تلاقيه راح خبطك بمفاجأة تاني و حدث تاني جديد أغرب من اللي قبله :)

قدر أحمد مراد يدخل جوه يحيي بطل الرواية جدا و كشف عيوب شخصية و مشاكل كتييييير جدا جايز تكون موجودة جوه حد مننا و بنتعامل معاها كأنها شئ عادي و طبيعي اتعودنا عليه زي ما كان يحيي بيتعامل مع مشاكله من غير ما ندرك تأثير المشاكل دي علينا ..

مش هاتقدر تتوقع الأحداث .. مش هاتقدر تتوقع اللي هاتلاقيه لما تقلب الصفحة .. مش هاتقدر تفسر حاجة .. مش هاتقدر تتوقع النهاية .. كل حاجة مفاجأة ليك .. قمة الإثارة و التشويق و المتعة :)

بعد ما خلصتها قفلت الكتاب و قعدت فترة مبتسم و مستغرب بأحاول استوعب اللي حصل :)

بالنسبة لأحمد مراد :

الرواية موضوعها مختلف تماما عن الاتنين اللي فاتوا فالأحسن إنك ما تقارنش بينهم .. بس الملحوظ و الأكيد هو إن أحمد مراد بيتطور تطور رهيب و أسلوبه بيتطور بطريقة سريعة .. تخلي تماما عن اي تطويل او رغي في القصة .. ما فيش اي ملل فيها يمكن باستثناء جزء بسيط في الآخر .. قدر يجذبك و يشدك باسلوبه من اول 20 صفحة لحد الآخر و انت متشوق و مشدود ..

مازال أحمد مراد محتفظ بطريقته الإبداعية في الوصف و طريق. الكتابة اللي تحسها قريبة لأفلام السينما مش للكتب :)

من اكتر الحاجات اللي عجبتني في الرواية هي التحليلات و التفسيرات النفسية و المصطلحات الطبية ، واضح جدا المجهود اللي بذله أحمد مراد في دراسة الكلام ده و الأمراض النفسية دي علشان يقدر يكتب بالطريقة دي و يقدر يوصلك لمرحلة إنك مش ممكن تصدق إن أحمد مراد ده مش دكتور نفسي :)

ملحوظة : لو فكرت في الرواية من الناحية العقلية جايز ما تقتنعش بيها لكن لو فكرت فيها من حيث المتعة و الإبداع و كرواية مشوقة تشدك و تستفزك إنك تقراها ييقي هاتقتنع بيها جدا و هاتعجبك :)

اقراها و استمتع بيها :)