والْف رحمه على اللي لِسَّه (قُلْنا وقال).

‫ اللي مَضَى وذمِّته.. مَثَل جميل.. يتقال.

‫ (ما هي نادْره في مصر حاكم.. يطلع ابن حلال)

‫ حاكم.. يِدادي الجميع.. ويبوسْ رقيق الحال.

‫ وده عِشْقِتُه: فلاحين.. طلَبه.. جنود.. عُمّال.

‫ وخاض معارك جِسام.. مين طلّع الاحتلال..؟

‫ مين اللي صحَّى الشعوب.. تكسَّر الاغلال؟

‫ ويْبُخُّوا أكاذيب في سيرتُه يسمِّموا الاجيال.

‫ من بعد ما شفنا غيرُه.. فهمنا عهد جمال.

‫ ياما انتصر.. ياما حَرَنِ المُهْر بالخيَّال.

‫ هل كان وجودُه العظيم.. حقيقه والّا خَيَال؟

‫ أسطورة حية.. مازالت عاصية ع الموال!!