بيعملوهم في فرنسا البنات اللي عمرهم 10 سنين، وأنتم الواحدة منكم تبقى زي البغلة ولا تفكرشي في شيء في الدنيا إلا إنها عايزة تشتري غوايش، إن قدر جوزها يجيب لها كان بها؟ وإن ماقدرشي تطير على بيت أم درويش الخياطة، ولا عم صالح مبيض النحاس (بيوت سري)، وعندك كمان القمصان الافرنجي اللي اللبوة منكم لما تتقطع صوابعها ماتعرفشي تعمل منهم واحد، أهم دول تتعلموهم تكسبوا دواهي، وتبقى صحيح اسمها شغلة وصنعة لو كانت يتيمة أو أرملة غلبانة مالهاش حد يوكلها تعرف تعيش منها، وآديكم خمس ست مصايب قاعدين ما فيكمش واحدة افتكرت الفكرة دي. آه يا مهاريش يا بُلدا يا ولاد الكلب! أنتم ما حدش فالقني غيركم.

‫ - هئ هئ مفلفل ليه كده؟

‫ - أحبكم وقلبي عليكم، لكن منغاظ منكم، عايز أقصف رقابيكم ماتعرفيش أنا قد إيه قلبي بيتقطع لما بشوف في السكة واحدة مسكينة شرابها مخروق ولابسة نص جلبية، وتلتقيها عدوك بتطّوح يمكن لا فطرت ولا اتغدت، وسبحان من يعلم دي خارجة من بيتها ليه، وييجي لها اتنين ثلاث خولات عايزين ياخدوها في فلوكة، ويوم في يوم تصبح معلقة فانوس تكتب عليه (ظهره علي) أهو راخر لو جرى لي أمر الله تصبحي إنتي رخرة ما تلقيش تاكلي.