مبدئيا دي مش قصص دي حتت من الجنة
تدور كلها في فلك القرية وحواديتها الي ماتتصدقش لكن صدق عمنا محمد الخولي بيقولك صدق
كل واحد في القرية يتولد يزرعوله شجرة باسمه تخلده وكمان يقعد تحت الشجرة تظلله وتحضنه باغصانها دي كانت اول حكايات المجموعة القصصية الرقيقة دي
كل حكاية هي وجه من الوجوه الكتير ووجع من اوجاع ما بتخلصش
اكتر حكاية عجبتني هي حكاية جميلة وهي بتقول الي مايشبعش علي طبلية ابوه حيفضل طول عمره جعان صدقتي والله يا جميلة
فضلت جعانة حتي بعد ما ايديها اتلفت بالدهب
الحكايات مش بس كدة ده فيها حب واخلاص وفراق وجن وعفاريت والدار والاشجار والحنين وقصص حب بتنتهي فالترعة وناس بتموت وناس بتعيش واهي كدة حال الدنيا لا بتقف علي حد ولا حكاياتها بتخلص
كتاب حاخلصه في قعدة بس حيمتعك متعة اكتر من حكايات نجيب محفوظ
بجد اشكر الكاتب علي هذه المجموعة الرائعة وارجو يعملها صفحة عالجودريدز عشان الكل يقراها
