اقتباسات من كتاب جاتوه وبسلة

‫ ‏زي ما في طبقة اجتماعية بتقاوم النزول ومتشبثة بمكانها، فالجيل ده كده برضو بيقاوم الكبر.‏

‫ ‏هل لأننا زهرة شبابنا اترشت بيروسول؟‏

‫ ‏هل عشان كل ما نوصل لحاجة نلاقي الدنيا بتعلي علينا، فنحس إننا مكاننا وما عملناش حاجة ونبقى عايزين وقت إضافي؟‏

‫ ‏هل بسبب السوشيال ميديا والتجميل اللي ضغطين علينا ومدينا أمل في شباب طويل؟‏

❞ وده ياسيدي سلوك إنساني بنعمله لما بنضمن وجود الأشياء، وبيكون معاه شوية طول أمل، إنه لسه بدري ما حدش بيجري ورانا، هو ما حدش بيجري ورانا فعلًا هما الوقت والعمر بس اللي بيجروا!‏ ❝

❞ اوعى تسألها مالك، ولا نسأل عالعيال عاملين إيه، وما حدش يحسسها إنها مجنونة عشان بتصوت وبتشد في شعرها ليل ونهار، وحذاري، حذاري تبعتولها أي فيديو عن التربية بأنواعها، لا إيجابية ولا سلبية. ❝

ونفضل ناسين نستمتع باللي عندنا، ما هو موجود هيروح فين ونفضل مركزين على اللي ناقصنا ونندب حظنا على نقصانه!‏

هنتغسل في غسالة الحياة عادي، بس في النص نحاول ما ننساش اختيارنا الحر هيكون إيه ونحاول نقرب منه على قد ما نقدر. دي حتى الغسالة بتلف لفتين وتوقف وترجع تلف تاني وتقف برضه، ما ينفعش نقضي حياتنا كلها في دورة العصر.‏

‫ ‏من ضمن التقاليع اللي حطّت علينا في العصر الحديث هي حفلة تحديد نوع الجنين! الله يجازيهم خير 2 بلوجرز ابتدوا الموضة دي وأعلنوا نوع الجنين بأنوار زرقاء على برج خليفة! إيه! إحنا هنكفر ولا إيه؟! إيه يا جماعة، فين تحديد نوع الجنين بتاع طنط جولفدان، موجهة الجغرافيا عن طريق اتجاه دوران منبت الشعر عند أخوه ولا أخته اللي قبله؟ ولا طريقة طنط سوزي، الخياطة بتاعة لو بطنك بالعرض يبقى ولد، ولو لقدام تبقى بنت؟ ولا نظرية خالة جوزك اللي كانت حاطة عينها عليه لبنتها وما بتطيقكيش وتقولك: "مدام خنشرتي ومنخريك كعبرت، يبقى ولد!"‏ ‫ ‏ده غير بقى جارتك المثقفة