اقتباسات من كتاب الصبر أصعب صعب

طعم الدم‏

‫‏سادنا وعم‏

‫‏مرَّر يُومنا‏

‫‏وبُكره اتسم‏

يدي مسِّت جلدي وجدته صار خشنان‏

‫‏يا ترى سببه الشقا ولَّا من سُنن الزمان؟‏

‫‏فرضوا على الفقرا يحيوا كما الأحجار‏

‫‏لا نعمة بتصيبهم ولا عرفوا ليها مكان‏

خنقوا كُل الطيب فينا وسابونا كمسخ وضيع‏

‫‏زحموا عقولنا بالتافه موضوع يجيب مواضيع‏

‫‏كسروا الأصل جوَّانا ولفُّوا حوالينا المتاهات‏

‫‏فقدنا الاتجاه في طريقنا واللي يضِل يضيع‏

السرقة عيني عينك والنهب ع الواسع‏

‫‏تنطق نشيل عينك مع لسانك وهنتابع‏

‫‏اتخرَست ولَّا بتكابر حرَّمت ولَّا بتعافر‏

‫‏وآخرتها كلامنا هيمشي ولا حد هيراجع‏

قبل الفُرقة ما تعرف دارنا عِشنا ليالي‏

‫‏دمنا واحد ومفيش واحد قال وأنا مالي‏

‫‏عربي بدون ألوان ولا شعارات تمزقنا‏

‫‏هنا القاهرة من دمشق صُوتها كان عالي‏

عَرَق النسوان الحلال خِلْفته حُر وأصيل‏

‫‏صَهْد البغايا الحرام رمْيته خوَّان هزيل‏

‫‏البذرة جوه أرضها شجرها يسند ضهرها‏

‫‏ونبتة عزازيل شمال متجيبش إلَّا العليل‏

باع الكُبار قضيتي سابوني وحيد بحِملي‏

‫‏اتذلِّلوا ع الصهاينة شرِبت بالغصب ذُلي‏

‫‏شيِّلوني فوق طاقتي وطلبوا مني الصبر‏

‫‏وأنا مجرد صبي أبيضاني وشعري كيرلي‏

تركوا أرضهم مجبورين ومفتاح الدار برقبتهم‏

‫‏في الرحمن متعشمين تقصر برحمته غُربتهم‏

‫‏إيمانهم الرهيب بالحق مقوِّيهم ليصرخوا لأ‏

‫‏في وش عصابة صهاينة ضعفنا بيزَود قِوتهم‏

يتيم الأم يعيش يتيم ولو ألوف تراعيه‏

‫‏ناقصاه لمسة إيدين على نفسها تبدِّيه‏

‫‏حضن يراضيه هُوَّ مهما كان غلطان‏

‫‏تِصْعَب عليه حيرته ومن الحنان يسقيه‏

موت أبويا وجعني أوي‏

‫‏سابني وأنا صغير أوي‏

‫‏كان عود الصبي أخضر‏

‫‏والعَزم لسه مش قوي‏

العالمة هزَّت وِسطها شعللت فيهم نار‏

‫‏العالمة هزَّت مُخها غمرتهم بالأفكار‏

‫‏رفعوا الوِسط على المنصة دعم وتهليل‏

‫‏طردوا المُخ بره ملوش مكان في الدار‏

الضحكة مال بختها بفعل حُسَّادها‏

‫‏الفرحة من قهرها دبلت على عُودها‏

‫‏يا حُزن متعافي بتقطم في الضهور‏

‫‏أنا أسير الآلام وأسير بمواعيدها‏

اعتزل كل ما يؤذيك‏

‫‏واعتزل ما لا يؤذيك‏

‫‏كله دلوقتي ضار جدًّا‏

‫‏من غير سبب يؤذيك‏

عريانة روح الحسود وتُوبها من الرضا مخلوع‏

‫‏الحمد لذته لذَّات مَيحسش بيها غير القنوع‏

‫‏قراريطك من الدنيا تساوي قراريط غيرك تمام‏

‫‏ربك قِسمته بالحق وعنده الظلم شيء ممنوع‏

تُوب الرجال قُماشه تقيل‏

‫‏مَتتحملوش جتة عَويل‏

‫‏لازمه دكر لايقان عليه‏

‫‏تُوب الرجال كِسوة أصيل‏

اللي ما يخاف ربنا حرَّص وخاف منه‏

‫‏ما رعاش عزيز خلَقه مستني إيه منه‏

‫‏مفيش حرام وحلال عيشته كلها بطَّال‏

‫‏إبليس أقرب قرايبُه واخد الجينات منه‏

حاشاك قليل الأصل لا تعاشره ولا تماشيه‏

‫‏طبعه الخبيث غلَّاب ينقح كل لحظة عليه‏

‫‏ضرباته تحت الحزام مهما تنصحه أعوام‏

‫‏ديل الكلب ميتعدلش ولو علَّقت قالب فيه‏

فتَّح عقلك كده قبل ما تفتَّح عينيك‏

‫‏غمَّض قلبك اتفرج وشوف حواليك‏

‫‏اعرف صاحبك من اللي مصاحبك‏

‫‏علشان يخونك وبيتمنى يغدر بيك‏

الضنك والغُلب متوزع ولكل واحد نايبه‏

‫‏سهم الهم نفَّاذ عارف صاحبه وصايبه‏

‫‏عَبْسِة وِش الحزين تِدلَّك على اللي بيه‏

‫‏مَقَصدوش يتنكِّد وتيجي الناس تعايبه‏

العافية عافية عقل‏

‫‏مش بالدراع والتُقل‏

‫‏ياما تيران خراتيت‏

‫‏سقطوا ضحايا نمل‏