مراجعات رواية ومسطر ع الجبين

هل ممكن حكاية بدأت من آلاف السنين تفضل مطاردة أصحابها لحد عصرنا؟ وهل الحب فعلًا بيقدر يهزم الظلم مهما طال الزمن؟ 🖤

اسم الرواية: ومسطر ع الجبين

الكاتبة: رضوى جاويش

دار النشر: إبداع للترجمة والنشر والتوزيع

عدد الصفحات: 372

التصنيف: رومانسية – اجتماعية

النبذة:

بتبدأ الحكاية في عصر الفراعنة، مع «إسينات» بنت الملك، اللي بتحب قائد الجيوش «آمون محب» في السر، لكن اتهامه بالخيانة بيقلب حياتهم رأسًا على عقب، ومن هنا بتبدأ حكاية غامضة يفضل أثرها ممتد لسنين طويلة...

وفي عصرنا الحالي، بنقابل «جميلة» اللي بتعيش وحدها بعد وفاة والديها، وبتبدأ أحلام غريبة تراودها، فيها أصوات وإشارات مرتبطة بحكاية قديمة مش فاهمة سرها. ومع رجوعها لنجع والدها في الأقصر، بتدخل عالم مليان أسرار وصراعات عائلية قديمة، وهناك بتتقاطع طرقها مع «علي» مدرس اللغة العربية، لتبدأ رحلة تكشف أسرار الماضي وتربط بين حكاية الأمس وحياة الحاضر.

وهنا تبدأ الأسئلة: إيه سر السلسلة اللي مع جميلة؟ وإيه علاقة الأحلام بحكاية إسينات وآمون محب؟ وهل ممكن أسرار الماضي تغيّر مصير الحاضر؟

رأيي:

الرواية جميلة أوي أوي! ❤️

أكتر حاجة حبيتها كانت الحبكة والسرد، وقد إيه الكاتبة قدرت تخلط بين أجواء عصر الفراعنة والحاضر بطريقة ممتعة ومشوقة. وكمان حبيت جدًا أجواء الصعيد، خصوصًا إنّي من الصعيد، ومع ذلك لقيت كلمات وتعبيرات اتعلمت معناها لأول مرة من الرواية 😂❤️

الشخصيات والأحداث خلتني مستمتعة وأنا بقرأ، وكل ما كنت أفتكر إني فهمت اتجاه الحكاية ألاقي فيه حاجة جديدة. والنهاية كانت من أكتر الحاجات اللي حبيتها، خصوصًا إن كل شخصية نالت جزاءها على قد أفعالها. وغير ده كله، الأبيات والأغاني الشعبية اللي موجودة في الرواية كانت تحفة فعلًا وزودت جمال الأجواء جدًا. 🥹❤️

⭐ تقييمي: 5/5