اقتباسات من كتاب ضِل عطشان للدفا

الناس ضعاف، تحت العَجَل نامت

‫ فوق الحصاير يفردوا الأرغفة

‫ ويخبّوا فيها الموت لحد الصبح

‫ ويجددوا المعرفة بخشونة الأكفان

يصحى القتيل مع قرب قبض الشهر

‫ يشهق كساحر في العجين يختِمِر؛

‫ في الباب فيقفل رمش عين البيت

‫ على لقمة عِرقت في أيادي القدر

إحنا رعايا الله في أرض المعرفة

جينا نموت في الأرض موتة مشَرِّفة

تِرضي الإله والقانون والسادة والأشهاد

إحنا العباد للظن والفلسفة

نحرق قلوب الناس عشان الدفا

والبرد من أسباب حرق البلاد للبلاد

إحنا الغرَق في العناد

ساعة غياب الصفة

عن كل حي وجماد

كل اللي فاته المراد

واصل في نفس الميعاد

كل الموتات منصفة

هذا أنا المُكتَشَف من بعثة الإنسان

‫ لحمي جعان للإيمان بالفقد دون مبالاة

‫ كل اللي رايح بياخد في الشنط بلواه

‫ فاضل في كتفي عضم ما أبلاه

الشعر أطعم من رغيف العيش

‫ أصعب وأعظم من دخول الحرب

‫ الشِعر مُوجِع

‫ زي كتر الضرب

‫ أَكتب وبصرخ م العذاب:

‫ يا رب

‫ عبّي في روحي كل شيء موزون

‫ واِجعل حسابي

‫ شعر مش حسنات