لتصنيف: رومانسى اجتماعي نفسي مشوقة
اللغة: السرد والحوار بالفصحى
عدد الصفحات: 289
نبذة عن الرواية:
تبدأ الرواية بالشيخ يحيى وهو متجه إلى المسجد قبل صلاة الفجر، فيعثر في طريقه على شابٍ طريح الأرض ملئ بالدم، فيحاول مساعدته، وتتولى الدكتورة ليل، ابنة الشيخ يحيى، علاجه، ليكتشفوا أنه فاقد للذاكرة.
فمن يكون هذا الشاب؟ وماذا سيفعلون معه؟ هل سيستمروا في مساعدته رغم جهلهم بماضيهم الذي ربما يسبب لهم أذى!؟ ام سيتخلوا عن عربي مثلهم في بلد أجنبي!؟
رأيي الشخصي:
الرواية بتتكلم عن الصداقة وانا بحب عالم البنات ده اوي، بتتكلم عن الأهل. الحب، الشغل، كل حاجة تقريبا هتعيشها في الرواية🥰🥰
هتلاقيها ممتعة جدا ماشاء الله ومشوقة ومن اول صفحة مابتبقاش عايز تسيبها، وحتى لما بتحس أن خلاص الأحداث الجاية بقت متوقعة بتحصل حاجة وترجع تاني مشدود ومتحمس تكمل ومستمتع بتفاصيلها وعايشة جواها🥹
محتاجين بس تبقوا فاكرين أن البطلة عقلانية👀
فيه شوية حاجات لفتت نظري في الرواية، اولا هي بجد اللهم بارك من الروايات اللي تبقا مطمن علي اللي هيدخل عقلك من الصفحات اللي بين ايدك مش لسة هتفلتره.
ثانيا ودي بجد حاجة مبهرة اوي بالنسبالي ماشاءالله أنها الحتت اللي فيها غموض والاسئلة اللي مش هتلاقي إجابتها في الاول معمولة بتوازن شديد أنه مايخلينيش انا شخصياً ابقى تايهة خالص ومش فاهمة فمش عارفة اكمل الرواية ولا حابة اكمل في التوهان ده، ولا معمولة بطريقة اللي هو اه اكيد هيبقى كذا، ولا حتى بيخليك مشدود اويييي لدرجة عايز تقلب الصفحات بسرعة عشان تفهم، لا بالعكس مشدود ومش عارف تسيب الرواية بس برضه مستمتع بكل التفاصيل لإن طريقة السرد مافيهاش حشو تفاصيل عايز تعديه عشان فيه حاجة اهم دلوقتي عايز تفهمها😂
حقيقي الرواية ماشاءالله حلوة اوييي وبتسيب أثر حلو ومبسوطة انها كانت أول رواية أبدأ بقراءتها من حصيلة المعرض السنادي🥰🥰
