الرقصة الأخيرة

رواية " الرقصة الأخيرة لـمروان الشامي"

❞ إن العيش في هذه الدنيا لا يهبك ربيعًا مقيمًا؛ فالحياة تدور بك كما تدور الأرض بفصولها الأربعة. ستعرف بردًا يقيد أنفاسك، وحرًا يذيب ما جمد فيك، وخريفًا تنتزع فيه الريح بعضًا منك، وربيعًا يعود فيه ما ظننته ميتًا إلى النبض من جديد. ❝

عارف أما تقرأ عمل يسحلك جواه و تخطفك الأحداث فجأة تلاقي نفسك في الصفحات الأخيرة أعتقد العمل ده قادر جداً يعمل كده كلغة و أحداث.

هل العمل حقيقة أم مسرحية ؟ مسرحية أم حقيقة ؟ أعتقد أنها مسرحية كبيرة تمثل الواقع ، ما الحياة إلا مسرحية كلنا اخدنا دور معين.

عمل عن "السلطة و الحرية الزائفة و الثورة ما بعدها ، التمجيد و الخلافات الخارجية و الداخلية " أشياء عادية ؟ عادية جداً لكن أعتقد ما ميزه هو طريقة عرض الكاتب كل الأفكار متشابهة و لكن طرحها يختلف من كاتب لآخر .

حبيت اختيار أسماء الشخصيات زي اختيار اسم " بشر " اللي أدرك حقيقة أنه مزيف عشان تتبني أفكار غيره و أنه الحرية مش بتمثل فقط أن نعظم افكار غيرنا عنها بل أننا نعيشها حقيقة بدون أحد معين .

او إسم " الحارث " أو " المهرج " كل الأسماء كأنها بالظبط بتمثل الشخصية و بتوضحهم فالـمهرج وضع حاكم للدولة ؟ أي حاكم هذا الذي بدون قرار ولا لديه قدرة ليوقف دماره الداخلي من انقسام الناس وافكارهم قبل الخارجي ؟ فما هو إلا مهرج حقيقة ضائع يحكم ولا يحكم وضع في فترة بعد الثورة ظن أن الناس أنهم تخلصوا من الظلم لكنهم في فترة ضياع .

أكثر حدث تأثرت بيه " بشر الممثل الثاني " ذلك الذي أتقن الدور الذي وضع فيه فلم يعد له شخصية خاصة فأنتحر يمثل دور غيره و يتبني أفكاره كاملة ، شبهته هنا " بشر " الأول جداً اللي حصل عنده عمليه سلب شخصية و أتمكن منه " هارون " فأصبح ظله بدون أن يدرك دوره !

حبيت بردو حال القرية بعد الثورة و كيف تحول الجميع لقناع " هارون " نردد الشعارات بدون تنفيذها أو أحداث فرق مجرد بغبغاء .

❞ الإنسان يرحل، بخيره وشره، لكن الأساطير تبقى. وكما كل الأساطير، يتناقلها الناس، يُشكّلونها حسب حاجتهم النفسية، يحولونها إلى رموز تبقيهم على قيد الحياة.‏ ❝

العمل فيه كتير الصراحة الواحد يكلم عنه ، أقدر أقول إنه حبيت ككل أحداث و لغة ، أسلوب الكاتب سلس و مشوق و عدم الإكتفاء بحدث واحد عندنا تسلسل زمني لطيف كل تسلسل بيوضح رسالة أو حدث حتي النهاية .

❞ لأن الخوف جعل الجميع حراسًا على أنفسهم. الناس يراقبون بعضهم، يُعاقبون بعضهم، يُسلّمون بعضهم. لم يعد بحاجة إلى جيش، لقد جعل الخوف جيشه. ‏ ❝

الحوارات بين الشخصيات كانت مؤثرة فالجزء الخاص بـ" الأبطال " و المقهي ، إلي جانب الجزء الخاص "الحارث و منذر "

❞ حرية التعبير لا قيمة لها إن لم نكن نملك القدرة على تكوين رأينا الخاص. الرأي المفروض لا يكون مفروضًا بالكامل، بل فيه إسهامات من الشخص ذاته. ❝

‏#مسابقات_مكتبة_وهبان

#المعرض_قبل_المعرض_مع_بالرسم_بالكلمات_2026

مع بداية العمل بنتصدم أول صدمة، الرقصة اللي مكتوبة في النبذة دي من أحداث حقيقية، قلت إزاي فيه حد يعمل كدة؟ لحد ما اتسأل الكاتب وقال فعلاً حصلت، مسكتش ودورت على الأساس طلع فعلاً ومعروفة باسم "وباء الرقص" لحد هناك كنت منبهرة بجد🙈.

أحلى حاجة في الرواية كانت اللغة والسرد للكاتب، حقيقي هما ليهم نجمتين كاملين، اللي خلاني أكمل العمل رغم أني مفهمتش حاجات كتير هما الاتنين، في البداية كنت داخلة وأنا بقول ياكش اللغة تعجبني لأني كنت طالعة من تجربة عنب العنب😂، وبالفعل عجبتني واندهشت بقى وكملت الرواية، أما عن الأسلوب فهو كان حلو بس لما كنا بنتنقل لفصل تاني بيتغير تقريبا اللي بيسرد ولو شاطر اعرف مين بيتكلم في الشخصيات😂

رسالة العمل كانت موضوعة بشكل حلو جدا جدا واتفاعلت معاها أوي الحقيقة، هي رواية فلسفية ومبهرة في أوقات كتير،على الرغم من لخبطتي اللي طول الرواية.

زي ما البداية أبهرتني فالرواية دي لخبطتني جامد😅

لحد بعد نصها مكنتش فاهمة هو إحنا فين وليه الشخصيات أسمائها بتتكرر، يمكن لحد ما خلصتها أنا مش فاهمة الشخصيات ليه حصل فيها كدة.

ونقطة كمان ضايقتني هي إني دخلت على العالم بوشي كدة، ليه مكانش فيه بناء؟ اوكي فيه حاجات اتعرفت في النهاية بس برضو متقدمتش بالتفاصيل الكافية اللي تخليني مدركة وفاهمة، ودي كانت حاجة غريبة إني حتى مفهمش الحبكة مع النهاية!

تنسيق الرواية كان فيه مشكلة أعتقد، حتى صديقة القراءة المشتركة كانت بتوافقني الكلام دة.

في نهاية المراجعة، فالعمل حلو حقيقي واستمتعت بيه، ولو كان فيه ترابط أكتر كنت هحبه أكتر بكتير.

#المعرض_قبل_المعرض_مع_الرسم_بالكلمات_2026