اقتباسات من كتاب خطأ 404

وعايزة حضن يكون وطن

‫ وعايزة حب يكون إيمان

‫ وعايزة شعر يكون ملاذ من أي جور

‫ مش شرط يِتحط في ديوان

‫ وعايزة ما أشتاقش لزمان

‫ وعايزة أكون زي الشجر جزع وجذور

‫ أتغدى نور

‫ وأطرح ورق

‫ ومش عايزة عمري اللي اتسرق

مساحات الشك بتنهِكنا

‫ بنكدب روحنا ومداركنا

‫ الكون مربوك وبيربكنا

‫ نِتهَتْ

‫ ونِتفرَفِت

‫ ونِبوش

‫ ونبدل بدل الوش وشوش

‫ ونقسِّم فِاللي ما نِملكهوش

‫ على أمل إنه في يوم يبقالنا

‫ اسم الله علينا وعلى حالنا

هذا،

‫ والبحث دايم والصراع محسوم

‫ حتى لو هتحاربي كل الكون

‫ حتى لو تمن الإيمان الكُفر

‫ تخيلي

‫ بعد الظروف ما اتغيرت

‫ والوقت ده عدّا

‫ سلمتي روحك للقدر

‫ ورجعتي صفر

هذا،

‫ والبحث دايم والصراع محسوم

‫ والدنيا ما بتسمحش لأي حاجة تدوم

‫ مفيهاش أماكن طيبة ومفيش

‫ ولا فرصة تطلع منها مش مهزوم

خلّصت كل المهام

‫ خلّصتها وخلِصت

‫ الحزن طابع عام

‫ إلا الفرح بالقسط