اقتباسات سها الفقي

الكسل صفة بشرية. لما ترتبط بإنسان ويبقى جزء من حياته وبعد سنين علاقتكم تنتهي، مش بس بتزهد الحب، إنت كمان بتكسل. بتكسل تبدأ من أول وجديد، بتكسل ترجع تتعود على حد وتعود حد عليك، بتكسل تقول لشخص جديد بتحب إيه وبتكره إيه وتطبعه بطباعك، بتكسل تقول انت بتحب كام معلقة سكر في الشاي، بتكسل تشرح تاني ليه بتتفائل بالبنطلون الكحلي، بتكسل تحكيله على الحادثة اللي عملتها بالعجلة وانت صغير، بتكسل تعيش مع شخص جديد تفاصيل توجعك.

في بنات متخيلة ان أهم إنجاز في حياتها انها اتجوزت وخلفت.

العلاقات زي الإدمان، وبعد الانفصال طبيعي تظهر علينا حاجة زي أعراض الانسحاب، انسحاب الشخص من حياتنا، انسحاب الذكريات، التفاصيل، الأماكن، الحاجات المشتركة. لو العلاقات إدمان فالذكريات هي المخدر نفسه والمادة الفعالة اللي بنسيبها عشان تنكد على اللي قدامنا. عاوزة تعذبي حد جدا، اعملي معاه ذكريات كتير وسيبيهاله كلها وامشي.

لازم تكوني مقتنعة ان اللي هيحبك لازم يحبك عشان ده إنتي بكل مميزاتك وعيوبك، إنسانة فيكي الحلو والوحش، لازم يحبك ويستمتع بصحبتك وروحك مش بشطارتك في فتح مواضيع مثيرة. مش مطلوب منك تقومي بدور التلفزيون في العلاقة اللي تدخليها!

ساعات كتير الكتاب بيبقى أحسن من البشر، على الأقل الكتاب بتبقى عارف فين أوله وفين آخره.

ربنا يكفيكي شر حياة عايشاها بدل غيرك

مهما كان سقف طموحك عالي، سيب لنفسك مساحة أمان عشان متتصدمش وافتكر إنك رايح تشتغل مكان واحد ساب الشغل ده عشان يروح مكان تاني.

امشي عدل عشان ربنا ثم نفسك، مش عشان أي حد يحتار فيك.