#مسابقة_ريفيوهات_الذين_عرفوا_أنهم_غرباء
#كتاب_الشهر_في_مكتبة_وهبان
دي أول مرة أشارك وأقرأ كتاب الشهر كامل في الشهر نفسه مش بعديه بكام يوم او حتى أأجله، يمكن العمل كان أقل من توقعاتي بكتير بس اتبسط إني هشارك معاكم برأيي البسيط عن الرواية.
..........
المراجعة تحتوي على حـ... ـرق بعض الأحداث⚠️
بعد إعلان أ. إسلام على كتاب الشهر فعلًا مكدبتش خبر وحملته وبدأت فيه قرأت حوالي 20% أو أكتر وبعدين قفلته، يمكن في الأول قبل ظهور عبدالحميد حسيت إني ممكن أشعر بغربة ديفيد أو حتى أتعاطف معاه علشان ساب أولاده ياعيني الراجل سايبهم وغصب عنه!
لقيت إنه شخص لا يبالي، مع أول واحدة شافها بقي كتكوت مبلول🙂!، قلت يمكن الكاتب عايز يوصل حاجة معينة في الشخص دة، وأعتقد إني ممكن اشوف ديفيد عادي بالنسبة لعبدالحميد في بعض الأحيان لكن ديفيد أصلًا دة لا يمّت لشخص عنده دين أصلًا، تطورت الأحداث وظهر عندنا عبدالحميد اللي هو شيخ أزهري تقريبًا، اللي معجبنيش وبرضو بعد ما شوفت آراء بعض القراء في شخصيته إتاكدت منه هو إزاي رجل دين وبيعمل كدة؟ يعني حتى في الجزء الأخير خالص بتاع نرجس هو ذكر إنه مقرأش المعوذتين وحاجة تانية حقيقي مش فاكراها لأنه شايف إنه يبص لحد بنظرة مش هي دة عادي وربنا بيغفر وغفور ورحيم ووووو، معنديش مشكلة إنك لما تغلط تعترف وتتوب، بس من المتعارف عليه إننا مناخدهاش حجة بقى وربنا هيسامحنا طبعًا!!
يعني ديفيد شخص يهودي وفي الآخر عرف إنه غلط مع أنه ميبررلوش، بس عبدالحميد راجل دارس وعارف وحافظ دينه ليه يطلع بالصورة دي؟ كانت إيه الفايدة من وجود مشاهده وتبريرات غريبة ومش منطقية لرواية طابعها مش فانتازيا حتى؟
الجزء بتاع لما راح لقبر أبوه وكان مكتوب عليه حاجات كدة، اتذكر حتة إنه بعد ما يموت هيروح الجنة وحوريات وهكذا تقريبًا، ودة جه في سياقه لو هنعتمد على فكرة إن ديانة ديفيد اليهودية فهو أصلًا مفيش حاجة تدل إن هيبقى فيه تنعم ومكافأة بحوريات في الآخرة زي ما بيذاكر الكاتب
كنت أتمنى اشوف حاجات كتير اوي في الرواية دي بسبب رؤيتي للغلاف والعنوان الجذاب، والحديث عن الكاتب الله يرحمه إنه شخص جميل وكتاباته رائعة...
يمكن أكتر حاجة شدتني للرواية فيها، سرعة سير الأحداث، والاسلوب الروائي مشوّق وفي النقلة ما بين قلم إيمان الدواخلي والكاتب إيهاب عبد المجيد محسيتش إن الكاتب اتغيّر غير في محتوى الفصل نفسه، إنه محتواش على حاجة خارجة، اللغة بسيطة وسلسة وحبيتها فعلًا.