#رفقاء٢٠٢٥
#حائط_الذكريات Noha Oda
"العائلة هي كل شيء...العائلة تحميك عندما يلزم الأمر...وانت ستحميهم عندما يلزم الأمر"
بهذه الكلمات بدأت نهى عودة كتابها الرابع في سلسة"عن العشق والسفر بعنوان "حائط الذكريات"، رحلة عائلية إلى بلاد الشمس المشرقة "اليابان"... ٤ حوائط للذكريات يختمها حائط اخير
في المقدمة التي وبعكس العادة أحرص على قرائتها بسبب الكاتبة، تحدثت نهى عن الذكريات وصناعتها، حلمها ب بيت كبير يسع الأولاد والأحفاد، بنظرة واقعية من رفيق الدرب...استبدلت الحلم ب حائط ذكريات في بيت الإسكندرية وبيت استراليا، محاولة في كل يوم صنع ذكريات تبقى في القلوب أولاً وإن عز جمعها في صور تبقى أبد الدهر
"يكفينا فقط أن نكون معآ لتصبح ذكرى"
في الحائط الاول بدات نهى الكلام عن ذكريات العائله في طوكيو اللي راحت لها بالرحله غير مخطط فيها تماما ...في اليوم الاول بتتكلم عن اجواء الرحله في الطائره وازاي وصلوا وبعد كده فكره وصولهم واجواء الفندق واول حاجه لفتت نظرهم هي موضوع الجراج المخصص للدرجات الهوائيه وكانت اول مغامره واول لغبطه في المراحيض الذكيه وصفتها في الكتاب بشكل حلو جدا ...التعامل معاها ومميزاتها لدرجه ان هما كانوا عايزين يعملوا زيها ف بيتهم في استراليا
"صديقتي الصغيره التي لا امل من صناعه ذكريات جديده معها كل يوم"
الجمله دي كانت بدايه الحائط الثاني في الكتاب وكان قرار العائله ان هم يروحوا برج طوكيو لانه قريب جدا من الفندق وكمان كان متخطط له بكل تاكيد
في الطريق بنشوف بعيون العائله المنتزه وتقسيمته وجمال المناظر فيه وبعد كده بنطلع معاهم البرج، هنا كميه معلومات رهيبه..بنشوف بعيونها الجوله الرأسية و بنشوف كمان مراحل صناعه البرج ولوحه الكولاج التحفه و بنعرف حكاية الكره الغامضه اللي هي في الاخر كوره بولينج
بنشوف كمان رحله كابتن ماجد اللي بنكتشف كلنا أنه مش عربي ده هو كان مانجا يابانيه ومش اسمه كابتن ماجد، بنعيش كمان مع خديجه لحظات البهجة والتصوير مع مجسمات المانجا المفضله ليها ، بنعرف كمان شويه عن ديانه الشنتويه اللي هي الديانه الرئيسيه في اليابان
"ابني الاكبر وصديقي العزيز اول ما رات عيني انسنا وانس وحشتنا الى هذه الدنيا... صاحب ذكريات الاقدم والاطول لا اخجل ان قلت انها الاكثر بريقا احيانا فكل شعور اختبرته معه كان الاول"
دي كانت بدايه الحائط الثالث في الكتاب وهنا كانت الرحلو بقطر الطلقه فخر الصناعه اليابانيه، هنا بنشوف وصف القطر وكمان بنتكلم عن نظافه اليابانين اللي الحقيقه موجوده في كل حته وبنتفاجئ مع نهى ان الفندق ذاتي الخدمه ودي كانت اول مره تحصل مع نهى فبيقرروا بقرار جماعي انهم يسيبوا الشنط في اللوبي عشان يلحقوا قلعه توساكا، وهنا انا من جمال الوصف قررت ان انا افتح جوجل واكمل معاهم خطوه بخطوه
نهى بتتكلم عن تاريخ القلعه ومراحل البناء والتدمير اللي اتعرضت له على مدار التاريخ و شكل القلعة من جوة وبرة و المشاهد المحيطة بيها...تحفة
عجبني قوي في الحته دي صوره خديجه ف الكيمونو و حسيت انها اميره يابانيه ضلت طريقها للقرن ال 21 وده من حسن حظنا
بعد كده بنتكلم عن زهره البولينا المقدسه وليه هي تحديدا هي الرمز اللي على وسام الشمس المشرقه اعلى وسام ياباني
في الجزء ده اتكلمت نهى عن حاجه اسمها الكبسوله الزمنيه وان في كذا كبسوله في كذا مكان منهم واحده هتفضل مدفونه لحد 5000 سنه يعني هتتفتح ٦٩٧٠ واصلا فكره الكبسولات دي ان هي زي تأريخ لشكل الحياه الحاليه خوفا من اي لخبطه نوويه تحصل واحنا للاسف جواها دلوقتي
بعد كده كان مشروع سهرة ثنائية اتقلب عائلية و بنروح معاهم دوتونبوري المدينه اليابانيه التحفة، برده هنا انا كملت معاهم على جوجل في محاولة لزيادة المتعة بصور اكتر
الحلقه الرابعه كان مع مالك مالك اوسط اخواته والأصعب ارضاء هنا بنروح معاهم يونيفيرسال استوديو...رحلة تحفه وكان ملك الرحله عالم نيتنتيندو اللي بيسكنها صديقنا ماريو، مين ما يحبش يشوف ماريو ويعيش جوه عالمه ؟؟
هنا كمان بنشوف الافعوانيه وتاريخها ورحله العيله فيها الافعوانيه بعد كده بنروح مينوس بارك والفوضى الجميله والرحله بتختم برده مع خديجه وصوره حلوه قوي ليها وبعد كده بنتعرف على هلو كيتي اللي اتحولت لرمزي ياباني لدرجه ان الملك البريطاني تشارلز حب يحسن العلاقات الدبلوماسيه مع اليابان فهنى كيتي بعيد ميلادها 50
بعد كبنكمل الرحله لحد اخر يوم اللي هو الحائط الخامس وهنا بتتكلم نهى عن مسجد طوكيو و الصلاه هناك وعماره المسجد والخدمات اللي بيقدمها
"ان الابحار في الذكريات لا يقل روعه عن صناعتها فكلاهما حركة وكلاهما يحتاج إلى رفيق فكان رفيقي الدائم...رفيقي ف الحركة والسكون"
اخر جمله في الكتاب كانت حلوه قوي "انتي من تجعلين البيت اي بيت بيتا "
الكتاب ده يمكن اثقل كتاب في السلسله ...كميه المعلومات عن اليابان كبيره جدا خاصه ان هي بلده بعيده قوي بعيد فالكلام عنها قليل في ادب الرحلات ولكن كالعاده نهى بتبدا في وصف المكان ونقل المعلومات التاريخيه باحسن واسهل طريقه ممكنه وبالتالي رغم دسامة الكتاب كنت مبسوطه ف كل صفحه
كمان فكره الرحله العائليه ودخول خديجه ومالك وانس بقوه جدا وحكايه التفاصيل خلتني طول الوقت حاسه ان انا قاعده مع صديقتي او حد من قرايبي وبيحكي لي ويقول لي بصي انا عملت كذا وشفت كذا وبصي الصور دي شفت ده
حقيقي برافو على كتاب بالدسامه دي والجمال ده... دايما يا نهى بتعملي السهل الممتنع...شابو
١/١6