مراجعات رواية روما هي أنا

هى صعبة هى صعبة بصوت " حفيظ الدراجى" ⚽️👨🏻‍🦱 الله يكون فى عون اللى ألفها واللى ترجمتها 😄🤦🏼‍♀️

أخيراً خلصت #روما_هي_أنا للكاتب #سنتياغو_بوستيغيو من إصدارات دار #الخان_للنشر_والتوزيع ترجمة #آية_حسين بعد شهر بالتمام والكمال قضيتهم مع حكم الرومان

فترة صعبة من التاريخ

مليانة برضه مشاحنات وحروب ونفسنة كتير

حكام جبابرة مش هاممهم غير السلطة

تيجى على حساب ايه ومين

مش مشكلة المهم نعيش مترفين

من خير أى شعب مسكين

نفرض ضرائب

وننشأ طرق ونعمل اصلاحات ونهدر فى المال العام🤷‍♀️ حتى فى روما كمان ده من قبل الميلاد 🫢

بس لسه فيه أمل أن يقف قدامهم محامى شاب فى العشرينات يواجه فساد الحكام

وينشر بلاويهم قدام المحاكم والقضاة

ويجيب شهود ويقدم مرافعات

مع الأدلة والبراهين

وكله على عين الحاضرين

بس تخيل لو من القضاة موالين 🤔 تفتكر هيبقوا عادلين 👨🏻‍⚖️ ⚖️

رواية صعبة حقيقى وأحداثها كتير ولا الأسامي 🤦🏼‍♀️ محتاجة تركيز 🧘‍♀️ بس هتدخل فى الأجواء مع المحاكمات هتزهق شوية من الحروب والتكتيكات ده أكيد

بس لما ترجع تانى لقاعة المحكمة والمرافعات هتنسجم معاهم آخر انسجام وتبقى عايز تعرف فى روما العدل فوق الجميع ولا بيتظبط حسب المصالح والتساهيل 😉

رواية حكت عن جزء مفقود ما نعرفهوش فى حياة " غايوس يوليوس قيصر " فى شبابه

قبل ازدهاره وانجازاته واكيد برضه كان له سلبياته ..

بدايته كانت ايه وطموحاته لحكم روما كان شكلها ايه

وياترى اتعلم الدرس و لا حذا حذو القياصرة اللى اتهمهم من قبل 🤷‍♀️

الرواية طبعا حجمها كان بالنسبالي يخض وتاريخ كمان فحسيت أن الموضوع صعب … بس كان عندى فضول أنى أخوض التجربة وماخيبتش ظنى واستمتعت بأحداث جديدة عليا مش هنكر أكيد أنى صابني بعض الملل فى جزء الحروب وحصلى لخبطة كتير ومابقيتش عارفة مين بيحارب ضد مين 😄 بس طبيعي ما الأسامي كتير والمعارك ما بتنتهيش ومحتاجة تركيز

أما الترجمة بقى كانت ممتازة 👌ومش هقول غير الله يكون فى عونك يا " آية " 😄🤲🏻

#قراءات_٢٠٢٥

#مكتبة_دنيا