مراجعات رواية الباروكازا (النفق الأسود)

رعب ، تشويق

3.5/5

من كام يوم دخلت مكتبة الشروق فرع سيتي ستارز اشوف ايه الجديد عندهم لاقيت الرواية دي واشتريتها لمجرد انها عن قصر البارون من غير ما أكون عارفة أي حاجة عن الكتاب او المؤلف واكتشفت ان لا الرواية ولا المؤلف ليهم صفحات على موقع ابجد(وعلى فكرة يا أستاذ ايمن انت نسيت تحط عدد صفحات الكتاب على الجودريدز)

حطيت في اعتباري ان الرواية دي هي التانية للكاتب واتكلت على الله ابتديت

الرواية بتحكي عن مجموعة طلاب بيخططوا انهم يصوروا فيلم رعب في قصر البارون على طريقة مشروع ساحرة بلير وبارانومال اكتيفيتي واللي هي مش نوعية افلامي المفضلة الحلقة وبتاصدفهم مشاكل ماورائية حقيقية مرتبطة بتاريخ القصر

الحاجات اللي عجبتني في الرواية هي

أولا انها اول محاولة روائية عربية جادة مركزها قصر البارون واسطورته وتاريخه (هرمت من اجل هذه اللحظة التاريخية وعلى فكرة مدرستي الثانوي كانت قدام القصر على طول)

ثانيا رغم كبر عدد شخصيات الرواية بالمقارنة بحجمها وتعددهم الا ان كل واحد فيهم متقدمله بطريقة جيدة تمنع وجود أي لبس او لخبطة

ثالثا المعلومات التاريخية كانت جيدة جدا ودمجها في سياق الرواية تم بشكل ممتاز

نيجي بقى للي معاجبنيش

الايموس مختلفين عن مجموعة عبدة الشيطان اللي كانت بتتجمع في القصر، في الواقع ظهور الايموس في العالم عموما جه بعد واقعة عبدة الشيطان في القصر بفترة مش قليلة ومن معلوماتي عن أعضاء الايموس وعبدة الشيطان انهم مراهقين(اكبرهم عنده 20 سنة) اغنياء محرومين عاطفيا ومحبطين نفسيا وملحدين غالبا وماعندهمش

استعداد يقدموا التضحيات المطلوبة لممارسة السحر وتسخير الجن

ونهاية الرواية كان ممكن تبقى احسن من كده مش هاقدر أقول ازاي عشان ماحرقش الاحداث

عموما شكرا يا أستاذ ايمن على الرواية الجميلة والممتعة وبالتوفيق