سيدة الأبدية : عودة أبناء نون - الجزء الأول

سامحني يا صديقي دردشة بالعامية.

رواية سخمت – الجزء الأول من عودة أبناء نون ما جتش في يوم وليلة.

الحكاية بدأت من أكتر من 3 سنين، قراية وبحث في مراجع كتير، وتفكير في الفكرة من كل زاوية.

شكل الرواية اتغير مرة ورا التانية، لحد ما استقرت على اللي إنت ماسكه دلوقتي.

سنة كاملة كتابة متواصلة… كتابة، تعديل، حذف، إعادة بناء، لحد ما حسّيت إن النص بقى أقرب حاجة للرواية اللي نفسي أقراها قبل ما أكون كاتبها.

الفكرة أصلًا جت من رغبتي إني أراجع شوية مفاهيم اتقالت غلط عن التاريخ، مش بمنطق المحاضرة، لكن من خلال حكاية.

ومن خلال النوع اللي بحبه فعلًا؛ الفانتازيا.

النوع اللي بقراه من وأنا شاب، واللي كنت دايمًا نفسي أشوفه متقدم بشكل يحترم عقل القارئ ويقدّم عالم له قوانينه وصراعاته.

سخمت محاولة صادقة إني أقدّم فانتازيا مختلفة، مش متصنعة، مش متعالية، وقريبة من القارئ، فيها صراع، وفيها أسئلة، وفيها متعة قبل أي حاجة.

أتمنى تعجبك،

وأتمنى تحس وأنا بتقراها إني بحكي حكاية كنت نفسي أسمعها الأول.

تخيل تكون عايش حياه في منتهى السعادة مع

شريك حياتك اللي بالنسبة لك كل حاجة في الدنيا كأنك في الجنة حرفيا، وفجأة كل دا يختفي..

تلاقي نفسك لوحدك وسط مخلوقات غريبة بتحاول تقتلك، وفوق كل دا لما تحاول تدور على

الشخص الوحيد اللي بتتلمس فيه الأمان تكتشف انه مات! واملك الوحيد انك ممكن ترجعه للحياه هو بأنك توصل لكيان اسطوري خارق الكل بيحاول يتخلص منه، بس مش دي المشكلة، المشكلة انك بتكتشف أن الكيان محبوس جواك، وكان كدا طول حياتك!

دي بس بداية المغامرة اللي هتخوضها البطلة

نوران في رواية سيدة الأبدية، الجزء الأول من سلسلة عودة أبناء نون، للكاتب الفذ طارق

عز Tarek Ezz ، عن الدار المصرية اللبنانية للنشر والتوزيع، وبالمناسبة الرواية دي أول رواية فانتازيا اقرأها مؤخرا وتكون بعيدة عن الجو المستهلك المتعلق بالعصور الوسطى، الوحوش الأسطورية، التنانين، والأجواء دي بل

رواية فانتازيا بتقدم الحضارة المصرية القديمة وشخصياتها المهمة، لدرجة تخليها اشبه بمرجع مبسط خاص بالحضارة دي..

أحداث حماسية في تصاعد مستمر من البداية للنهاية، أظن المقدمة لوحدها تبين أول كام صفحة من الرواية عاملين ازاي، والأعظم من دا كمان الشخصيات المكتوبة باحترافية عالية وتباين شديد، كل منهم له دوره المميز المرسوم

بشكل يخدم الحبكة كليا، بل حتى اللي يضيف عنصر فكاهة لأحداث العمل اللي مسببة حالة

من التوتر والحماس المستمر..

ففيه الشخصية الضعيفة المتواكلة، القوية الباردة، الأكاديمية المدفوعة بذنب قديم، والمضحكة لكن بتخفي ورا حسها الهزلي جوانب تانية، ومع تقدم الاحداث بتظهر الجوانب الخفية لكل الشخصيات دي، بل وتطورها اللي ممكن يؤدي لحبكات وصدمة كلية للقارئ..

نهاية صادمة ومحمسة جدا للأجزاء القادمة وحقيقي شاعرة بالامتنان والفخر لقراءتي المسودة الأولى من العمل ومراحل تطوره، ومتفائلة بمستقبل عظيم لروايات الفانتازيا في الوطن العربي بوجود قلم مختلف ومتميز زي

قلم أستاذ طارق عز

#سيدة_الأبدية

#عودة_أبناء_نون