كما فوق كما تحت

مش قرائتي الأولى للكاتب قرأت له قبل كده رواية نيورا ورغم أن كان عندي بعض التحفظات على أفكارها لكن قيمتها بخمس نجوم لتماسك العمل وجرأة الطرح والمزج اللي كان فيها بين الخيال العلمي والديستوبيا ويمكن الفلسفة، ورغم اني للمرة الثانية ممكن اختلف هنا مع الكاتب في موضوعات كتير مطروحة في الرواية دي

لكن غصب عني لازم أقوله شكرا علي احترام عقولنا

وعلى حجم البحث وجمع المعلومات اللازم لكتابة رواية زي دي اللي واضح انها مبذول فيها مجهود كبير والربط بينها وبين فكرة خيالية أصلية لم تطرح من قبل على حد علمي أو أنا أول مرة أشوفها أو اقرأ عنها وده أصبح شيء نادر

يمكن النص الأولاني من الرواية كنت حاسس أنها بتحاكي أعمال دان براون في حبكات البحث عن الألغاز والأسرار الدفينة وده يمكن كان هيقلل من تقييمي شوية لولا أن الكاتب أضاف في الثلث الأخير بصمته المميزة بمزج الخيال العلمي في الحبكة وقلب دفة الأحداث تماما في اتجاه مغاير

كمان عجبتني النهاية ودي اصلا عقدتي في أي رواية والسبب في خفض تقييمي دائما لأعمال كتير

هنا أنا مقدرش أحدد أذا كانت نهاية مقفولة والا مفتوحة النهاية هنا تحمل المعنيين وتفتح باب جديد للتفكير والخيال الجامح وتقلب صراع البطل الداخلي رأسا على عقب وكأنها جت لطمه مفاجئة على وجهه ووجه القارئ في ذات الوقت

قبل ما يقولك خلاص الحكاية خلصت كمل انت بقى مع خيالك براحتك

مش عاوز أحرق أحداث

وبصراحة شديدة ورغم الاختلاف في بعض الأمور الرواية تستحق الخمس نجوم وهتكون من ترشيحاتي الأولى

والحقيقة الكاتب بيأكد في كل رواية جديدة أنه بيقدم شيء مختلف عن باقي الأقلام الأدبية على الساحة وأن له لون مميز قليل جدا اللي بيكتبوا فيه

بالتوفيق للكاتب وفي انتظار العمل القادم ان شاء الله

للمره الثالثه يبهرني الكاتب

الروايه دسمه جدا ومليانه مفاجئات من أول صفحه لغايه آخر سطر في الصفحه الأخيره

كمان حطتني في حيره بين الشخصيات مش عارفه احب مين واكره مين وبعدين اللي احبه ارجع اكرهه تاني

الفكره اكثر من رائعه وكعادته برضه مزج الفلسفه مع الخيال مع المشاعر مع حبه صدمات وعياط مع شويه كوميديا مع كميه معلومات كتير جدا بأسلوب مبسط ومشوق يجذبك تقلب صفحه ورا صفحه لغايه ما النهار يطلع 🤭

مقدرتش اسيبها غير وانا مخلصاها

تستحق الخمس نجوم بجداره 👍

تانى قراءة لأستاذ أحمد استمتعت جدا بنيورا وفكرتها وقوة ترابط العمل ،واستمتعت جدا بتكرار عمل قوى وممتع وقوى سلس فى الأحداث ومشوق أتمنى أشوفه فيلم سينمائى فى يوم ما .