كل حكاية من حكايات " وحدي لكن ونسان " فيها سر يمكن يكون في قلبه، نيته، أخلاقه وتعامله مع الناس، في ابتسامته .. بس السر ده هو الي مونسه وجابر بخاطره ومخليه يكمل. لو دورت جواك هتلاقي السر ده موجود عند كل حد، مستخبي بس ممكن يكون هو طوق النجاة ...
كتاب ينفع يفضل مستمر وليه أجزاء كتير ؛ أي بلا نهاية ما هو حواديث كتير شبهنا، مننا وفينا عن ناس شبهنا وشبه الي تربينا بينهم ... ولسه ممكن نقابلهم وناس شبهم كمان .
الشخصيات في الكتاب تحسها وحيدة من الخارج، لكنها داخلياً تعيش حياة مفعمة بالمحبة والبهجة والبركة، وده خلى القصص تحمل طابع فلسفي عميق في إطار واقعي بسيط .
الأسلوب واللغة شخصي وحميم، يتميز بالبساطة والرقي في التعبير، وكأن الكاتبة تعرفك بشكل شخصي وبتحكيلك وانتم قاعدين تشربوا القهوة في البلكونة وقت العصر.
وهو عبارة عن تصوير ناعم لروح الحياة المصرية، إثارة لأفكار حول الوحدة والامتلاء الداخلي.
"وحدي.. لكن ونسان" كتاب دافئ وحنون ، بيقدم تجارب إنسانية من قلب الحياة اليومية في مصر، بأسلوب بسيط وشاعري. إذا كنت تقدر القصص التي تتناول الحياة اليومية وتقدِّر التأمل في التفاصيل، فهذا الكتاب سيكون رفيقاً جميلاً لك.
☕ "عم سامي" كان متونس ببركته اللي بتحل مكان ما هو يحل! الفيوم كانت بتوحشه آه ساعات.. بس كان على طول له سفرياته لهناك وقعداته مع الأهل والجيران اللي ما تقطعتش كل السنين دي.
" اللي زي "عم سامي " ده:
لا نستغني عنه..
لا في الفيوم ولا في محطة رمسيس !
☕ البيت كان دائما زحمة وولاد "تيته إكرام" صغيرين، لما ما كانتش لسه بقت تيته ولا حاجه كانت لسه ماما، كان البيت زحمة بصحابهم، وخَفَّت الزحمة شوية شوية لما كل واحد شَقّ طريقه في الدنيا، بس كان يروحوييجي، و"ماما إكرام" ساعتها كانت بتدعي لهم: أهم حاجة بس هما بعيد ولا قريبين يكونوا مبسوطين ومستريحين في دنيتهم مش مهم .
مش مهم هما في نفس البلد ولا مسافرين، المهم يكونوا مستريحين وراضين، وربنا راضي عنهم، ونافعين نفسهم ونافعين غيرهم..
☕ نقلت "سما" حُبّ كتير من هنا لهناك، ومن هناك لهنا .. ودي أكثر حاجة كانت "سما" بتحمد ربنا عليها وهي نايمة على مخدتها بالليل: إنها تكون سبب لحد يبتسم، سبب لحد يفتكرها .. فالفرحة تملا وشه! سبب لحد تيجي على باله.. فيروق بعد ما كان مهموم !
سبب الخير والسلام!
وده يغنيها ويكفيها وزيادة
#وحدي_لكن_ونسان
#هبة_المنسي
#دار_ليان_للنشر_والتوزيع
#كتب_أحببتها
