قبل ما أقرأ الرواية شفت شوية مراجعات عنها، الكلام ما بين أن أسلوب الكاتبة مميز، الرواية فكرتهم بألف ليلة وليلة كجو عام يعني، قلت طيب ما أخوض التجربة بدون مقدمات كتير كدة؟
وبالفعل كان فيه تجربة سابقة لقلم الكاتبة بس كانت رواية يعتبر مشتركة الكتابة (الذين عرفوا أنهم غرباء) ممكن مكنتش عارفة أميز القلم الكاتبة عن قلم الكاتب وقتها بس بعد تجربة العدد دة ففي الأغلب الجزء اللي كان عاجبني في الرواية المشتركة كان من كتابتها🫣.
العدد عامل زي الونس وأنت بتقرأ، حسيت حقيقي كأني عايشة معاهم أو إني انتقلت العالم دة وبعاصر معاهم الحكاية وأنا لابسة طاقية الإخفاء😅.
لو هديكم زي نظرة سريعة للفكرة العامة فهقول أننا بنعيش فترة قصيرة مع التاجر اللي لما أفلس قام يدور في الصناديق القديمة والورق، يمكن يلاقي وصل فلوس ليه مع حد، وتخيلوا بقى ممكن يلاقي إيه أو ميلاقيش يمكن؟
من الأجزاء اللي اتسلط الضوء فيها كانت على علاقة الأب ببنته، حبيت علاقتهم أوي، هي لما تزعله بتحاول بسرعة تصالحه، وهو لما يجي عليها بيتدارك نفسه بسرعة ويهوّن عليها على قد ما يقدر، وهنشوف كمان ممكن يحصل إيه مع الأب وبنته من تحديات وصراعات خصوصًا بعد ما يحصل موقف مؤلم وهيكسر الاتنين!
زي ما قرأت ريفيوهات أن قد إيه أسلوب الكاتبة مميز، فدة أنا بأكده جدًا، أسلوبها حلو أوي، ولما يجتمع الأسلوب الحلو مع اللغة البسيطة مش الركيكة بيخلوا الرواية حلوة وتتحب حتى لو حصل ومعجبتكش الفكرة.
حسيت إني بقرأ حد بيحكي قصته بهدوء كدة وبيفهمك كل حاجة، بياخدك من إيدك يعرفك ع الأحداث وأنت بتقرأ، مش بيجري ويكروت في الأحداث ومش بيحط أي تفاصيل زيادة صفحات وخلاص.
شخصية أبو الخوالد كانت مميزة أوي، بتصور الإنسان في كل تصرفاته، حيرته لما ياخد قرار مصيري، تفكيره وتهيؤاته، طيبته وصراعه مع نفسه بين بنته وحاجات تانية..
شخصية مزاهر النبيهة، اللماحة، السميعة، الحالمة والطموحة... كانت عاجباني أوي فيها، مش متصورة بالست المظلومة الكئيبة اللي الكل جاي عليها😅، جاية بشخصية قوية ومساندة أبوها، طموحة ونفسها تعمل وتوسع التطريز اللي بتحبه، باختصار كانوا أكتر شخصيتين عجبوني وعجبتني علاقتهم جدًا.
بالنسبة أن دة أول عدد فهو لا يحمل نهاية مفتوحة يعتبر، كانت قفلة نوعًا ما لا تدل على أعداد تانية، بس في نفس الوقت متحمسة اشوف ممكن يكون فيه إيه تاني في العددين الجايين.
وعجبني أن في احتمال كبير كل عدد ممكن نقرأه لوحده بدون ترتيب، وممكن نشوف الكاتب في دة.
جزء لذيذ وقليل أوي الرسومات اللي كانت في العدد دة، فكرة كمان حلوة أن يبقى في حاجة زي كدة للتخيل أكتر.
قضيت مع العدد دة وقت لطيف وآنسني في كذا جلسة قراءة قصيرة، أكتر حاجة عجبتني حقيقي كان أسلوب الكاتبة ولغتها اللي مش بتفرد عضلاتها بل بالعكس بسيطة وسلسة جدًا، الجميل كمان اللي احب أذكره أن العدد يصلح لجميع الأعمار ودة في الوقت الحالي بقى قليل لما ألاقيه فحبيت أقول.
#فنجان_ومراجعة_سلسلة_ورد_الحكاوي
#كتوبيا_للنشر_والتوزيع
#مسابقات_فنجان_قهوة_وكتاب