- عالمي الهادئ

- إسماعيل وهدان

- اجتماعي _ نفسي

- ١٢٧ صفحه على ابجد

- ⭐️⭐️⭐️⭐️

-لغة عربية فصحى

⭐️ نبدأ الرواية بامل ان تكون النهاية سعيده لتتركني محتارة مع هذا الوعد الغريب عشان اكمل واعرف ع كل صفحة ليه الوعد ده اتكتب فالأول انت في كل صفحه بتدور عالنور والأمل وسط الحرب والدمار اللي شدني فيها إن الكاتب متكلمش عن الحرب كرصاص وقنابل وجيش بس لأ قدّمها كوجع جوه الروح ، كذكريات بتطلع عليك فجأة من غير ما تستأذن.

⭐️ هي رواية مؤلمة بتحكي عن الحروب من غير أسماء ولا خلفية عن فكرة الحرب واللي بتسيبه جوا البشر ، عن التغيير فالنفوس نتيجة الضغط والظلم والوجع عن انك ممكن تجبر على الحرب بس انك تتغير دي ترجعلك انت يا تحافظ على قلبك وجوهرك يا تتحول لوحش تايه مش عارف عايش ليه .

⭐️ حبيت البطل وحبيت كفاحه انه يوصل لنقطة نور وسط الضلمة انه وسط كل الحرب كان بيدور عالحب والونس والفطرة السليمة كان بيدور على امل يخليه ثابت على اختياره وأحلى ما في الرواية انها بتخليك بعد آخر صفحة تسأل نفسك هو فعلاً الإنسان يقدر يخلق لنفسه عالم هادي وسط كل الدوشه دي؟ ولا ده مجرد مهرب جوا كل واحد فين بنرجع له وقت التعب وفقد الأمل .

⭐️ هي رواية تستحق القراءه والتفكر فيها وهتشغل عقلك خاصة انها بتتكلم عن الحرب اللي بقت محوطانا في كل مكان وبنشوف اثرها بس مش حاسين بوجعها زي ما المفروض يكون ، بعد ما تخلصها هتلاقيها تركت جواك اثر وأمل زي ماوعدنا الكاتب فأولها .