📌أن تكونى أماً يعنى أن تقلقى بشأن شخص ما طوال الوقت.

لاورا وألينا أصحاب قريبين

افكارهم متشابهة إلى حد كبير

عايشين حياتهم بالطول والعرض

دراسة وسفر ونـ have fun

وعلى اتفاق أن الأمومة مش فى البلان

أصل مش طالبة ربطة وقلة مزاج

شايفينها عائق عن الحياة

ليه اربط نفسى جنب العيال

ويبقى شغلى الشاغل ليل ونهار

اودى واجيب من مدرسة لتمارين

و parents meetings وحفلات end of year

ونلغى اتفاقات ومواعيد وخروجات علشان امتحانات وصداع ..

وفلوسك تبقى مش ليك … تحوش كل مليم علشان تدفع المصاريف ولا السبلايز ولبس العيد

وأنت فين يا مسكين مش عارف تجيبلك بنطلون ولا شميز 🤷‍♀️

ده غير الضغط النفسى الفظيع ومش هنتكلم عن البدني علشان أغلبنا عارفين 🤦🏼‍♀️

ولا طموحاتك اللى بتتأجل لسنين خلينا ساكتين 🤫

ده كان فكر الصاحبتين 🤷‍♀️

لكن ياترى هيفضل ده كتير

ولا على سن معين هتنكش مشاعر الأمومة واحدة من الصديقتين ..

وتتشق الصداقة لاتجاهين

لاورا شالت الفكرة من جذورها ومنعت من الأصل أى محاولة

وألينا قررت تخوض التجربة وتتخلى عن حياة السنجلة وتجازف بحياتها وتتحدى صعوبات بتقابلها من أجل الخلفة

يا ترى تجربة كل واحد منهم هتبقى عاملة ازاى

هيندموا على قرارتهم ويقولوا يا ريت اللى جرى ما كان … ولا كل واحدة فيهم هتتأكد أنها كانت ✔️

اصل الأمومة مش بس كلمة أو لقب، دي رحلة طويلة مليانة حب مع حبة مرمطة😄

الأمومة هي إنك تكتشفي إنك تقدري تصحي من النوم في نص الليل وتتحولي لممرضة، وطباخة، ومصلحة اجتماعية في نفس الدقيقة 🤦🏼‍♀️ الأمومة هي إنك تشربي القهوة باردة، 😄 ده لو شربتيها من الأساس 😄

رواية مؤثرة وانسانية فيها مشاعر كتير حلوة بتحكي عن الأمومة، والوحدة، واختيارات الحياة اللي مش دايمًا سهلة. حبيت تعبيراتها وجمال كلماتها وترجمتها كانت بصراحة روعة 👌…

أسلوبها بسيط وهادي، وفيه لمسة إنسانية تخلي القارئ يحس إنه قريب من الشخصيات جدًا 💙الرواية بتوصلك أن الأمومة ملهاش شكل واحد محدد، الرواية بتخلينا نشوف الأمومة بشكل أوسع مش بس كإنجاب، لكن كعلاقة، ومسؤولية، وحتى كحب وخوف 😊

عيب الرواية الوحيد بالنسبة ليا كان نهايتها..كنت مستنية نهاية أقوى واضحة ومفهومة بس النهاية جات مخطوفة … 🤷‍♀️

📌 إنه عناء بلا شفاء. لا أحد يصارحكِ بذلك عندما يتحدثون عن الأمومة.

#مكتبة_دنيا

#قراءات_٢٠٢٥