كان صعب اكلم عن العمل بدون حرق للأحداث
⚠️فالريفيو ده يحتوي علي حرق للأحداث
لقاء جديد في تاني عمل للكاتب عصام الزيات بعد الكلب الذي راي قوس قزح، و بعد اثبات موهبته في اول اعماله.
بس ياترا قدر العمل يكون علي نفس المستوى هجاوب علي السوال في الاخر.
بنبدا الرواية مع عجايبي و اعادة تمثيل جريمة قتل انجي مراته ،مشهد يخلينا نتصور اننا داخلين علي رواية جريمة، لكن واقع الرواية غير كده و كان بداية موفقة للعمل.
ثم بيجي الدور علي ظهور الدكتور عمران دكتور الأمراض النفسية، و هنا يجي سوال في بالي هو مين بطل العمل الحقيقي عمران ولا عجايبي ولا البطل المكان قرية جهنم في الأقصر.
فجاة بيتم نقل الدكتور عمران من طنطا (منور يا دكتور عصام تفتكر تحب تروح الأقصر زي عمران ) الي قرية جهنم في الأقصر و الكاتب أبدع في كتابة مشهد رحلة عمران في قطار الصعيد بوصف تفاصيل اللي سافر و ركب قطارات عارف أني الكاتب صور الواقع ببراعة و انا شخصيا شوفت جزء من تجربة السفر دي ،و لحد هنا الرواية كانت لطيفة و الراكب الغريب قدر يضحكني و تصورت أني العمل أقل سواد ،لكن طلع دي حلاوة البدايات بس.
ثم بيجي بطل تاني و هنا البطل هيكون المستشفى مسرح أحداث و حياة دكتور عمران الجديد ، و الكاتب قدر يعمل كوكتيل من أنواع و أشكال الأطباء و التمريض و الموجود في واقعنا، لكنه كان بخيل و كنا محتاجين تفاصيل أكتر عن الشخصيات دي لاني الأمثلة حلوة لكن المرور و التعامل معاها كان بالنسبالي اقل من المفروض شخصية زي الممرضه زينب دي كان ممكن تكون أسطورة في مكان زي ده ، و هنا عندي نقد مش مقتنع خالص بفكرة تكليف طبيب نفسي بالطوارئ ،بالرغم من عدم ممارسة الطبيب النفسي الطب الا انه ممكن يوصف روشته لأنه درس فارما و عارف التفاعلات الدوائية و الاسماء العلمية للمواد الفعالة.
نيجي بقي للقاء الأول بين عجايبي و دكتور عمران و بالرغم من المناورات عشان يروح بيت الشاذلي عشان ماحدش يشوفه الا انه بعد كده اللقاء بينهم بقي عام و في القهوة فكان ايه لزوم اللفة دي كلها.
و انا بقرأ حديث عمران و عجايبي في الجزء ده كتبت عليه ملاحظة اني الحديث ممتاز و الكذب و التبرير من عمران قدر يعمله ببراعة.
و لحد قبل اللقاء الاول بين عمران و عجايبي و يمكن كمان في فترة تقربهم من بعض العمل كان ممتاز و في القمة ،ثم للأسف حصلت تحولات غريبة عجيبة زي عجايبي و العمل بالبلدي فرط من ايد الكاتب .
موت الطفل ابن عجايبي بالرغم من أهميته في سير الاحداث الا أني أعتقد كان ممكن يتم تصويره بشكل أفضل.
غيبوبه الدكتور عمران لو جاز نسميها كده بعد شراب زجاجه في الغالب فيها مادة مخدره قدرت تدخل عمران في حالة برود و عدم تركيز و كسر المستشفى و اخد حق الناس من المدير و شلته ، ليه اشوف المشهد هنا فلاش باك كان يبقي روحه و تناوله مختلف لو المشهد كان في وقته ،عمران تم تخديره اسبوعين و يصحي ناسي تماما و هو دكتور نفسي فأعتقد كان ممكن يساعد نفسه يفتكر و يشوف ايه المادة اللي اتخدر بيها ، بس كده لا هو كان ايه الغرض من دس مادة توصله للحالة دي سوال كان لزم نعرف له إجابة.
نيجي للقاء انجي و عمران و هنا هنرجع لجزء في الأول و هو بالرغم الظاهر علي الممرضه زينب أنها بتحافظ علي عادات البلد الا انها لفتت نظر عمران أني مرات صاحبه حلوة ايه التناقض ده، طب راح عمران و هو لسه تحت تأثير اللي حصل و رايح يخرج انجي من حزنها فيبدا يحاول ياخدها في شباكه لاشباع رغبات اتحرم منها و قرأت في بعض مراجعات الرواية أني عمران بيمر بأزمة منتصف العمر ،طب عمران من اول الرواية متنزن و عاقل و محترم فجاة و هو في قرية في الأقصر ومرات صاحبه هيفكر فيها اما تكلمه و يبدأ يحاول معاها مش قادر اقتنع بالتركيبة دي ،و هنا هرجع لنقطة مهمة جدا و هي نسرين و ايه سبب رفضها للعلاقة الزوجية مع عمران في اجازته ايه السبب مفيش مبررات واضحه و عمران مش مرسوم شخصية ضعيفة حتي لو اتضغط عليه من نسرين بحجج المظهر الاجتماعي و المدارس الغاليه و الشقة بس مش الراجل اللي مراته هتمشية .
في تطورات العلاقه بين انجي و عمران و المقابلة بينهم ،اللقاء بصورته مكنش له داعي ولا غرض الا انه اتسبب في موت انجي لانه زرع الشك فيها اكتر لكن و هي لبسه نقاب و عجايبي عينه مش بتشوف كويس فيشك انها هي صعبه لو هي اصلا منقبه هقول ممكن يتعرف عليها ،نيجي بقي لقصة الرسالة اللي بعتها عمران و تليفون انجي بيتصلح التليفون مفهوش خط عشان يقدر يفتح نت فايه كان هيخلي عجايبي يوصله بالنت عشان توصل الرسالة؟!
بعد لقاء عجايبي و عمران و الحديث عن الشك في مراته في نهاية المشهد بنشوف عمران قدام المستشفى بيطلع تليفونه و بيكتب حاجة بعصبية فالطبيعي انا كقارئ شكيت انه بعت ل انجي يحذرها من شك عجايبي و الشك بيتاكد بعد كده اني ده اللي حصل زي ما بنشوف ،لكن أنجي اللي خافت من اللقاء و خايفه من الكلام و مترددة فجاة بتصور نفسها زي ما عاوز عمران مش قادر اتقبل التناقض ،كمان بعد كده عمران بيحاول ينفذ عجايبي من وبيبعت الصورة لحساب عجايبي هنا للأسف حصلي لغبطة لاني الاحداث كانت بتدور في وقت واحد و كنت احب اشوفها بطريقة كتابة مختلفة.
نيجي بقي للطامة الكبرى النهاية من أول انهيار عمران و رجوعه علي طنطا بنشوف نسرين بتحاول تقف جامبه تمام لكن اما بتقلب في التليفون و بتشوف الصوره و بتعرف انه خاين بتتطلب الطلاق ما انتي السبب هو انتي كزوجة كل المدة دي و مفيش علاقة ولا ود و شايفه جوزك بنك بيصرف بس متوقعه انه هيبقي شيخ تناقض كمان و كنت محتاج بدل اخدت مساحة في الفصل الاخير تظهر انها تتكلم و تعبر عن روحها.
المدير الجديد ظهر بدون اسم و بدون تفاعل مع عمران اللي أكيد سمعته بعد ضرب المدير القديم سبقته كان ممكن يكون في جزء لده أفضل من اننا نتوحد مع عمران في محادثات.
نيجي بقي ل اكتر نهاية مستفزه قراتها يعني انجي تموت و عجايبي إعدام و نسرين هتتطلق و عمران و اتفضح و اتفصل من الشغل و العيلتين اتفضحه في البلد و ام انجي و ماتت تقريبا كمان ليه علي رأي الزعيم و عندما عرض هذا العمل مات المشاهدين جميعا، كان ببساطة ممكن يتم استعادة الصورة المحذوفه من تليفون عمران و يطلع عجايبي براءة مش هيبقي ظلم في بداية حياته من دكتور الجامعه و ظلم في نهايتها و اعدام ظلم لاني موتها كان بدون قصد .
نيجي ل اختيار اسم الرواية رغم فلسفية و رمزية الاسم و انه كان ده احساس عمران انه زي الهامستر اللي شافه، الا انه كان ممكن اختيار اسم مختلف يعبر عن محتوي العمل ، لأني عمران هرب مش استخبي في العجلة.
حاليا بيتم استخدام الكلور بدل الفينك في التعقيم في المستشفيات.
و ملاحظة اخيرة في مشهد اعادة تمثيل الجريمة كان لزم يكون وكيل النيابة حاضر مع ضابط المباحث اللي كان محتاج اعرف متعاطف مع عجايبي ليه .
و يبقي السؤال اللي حصل بين عمران و انجي خيانه ولا لا؟
و سوال كمان بيطرح نفسه مستشفي متطور في الظاهر لكن بعقول قديمة و محاط بعادات و أفكار متخلفة زي الشيخة في الطواريء.
❞العقل البشري حين يريد شيئًا فيفتح أبوابًا لم يعرف أحد أنها موجودة فيه❝
❞الوضع في المستشفيات لا يفهمه غير العاملين بها. مكان مقدّس لإنقاذ أرواح البشر، لكن لو تحتّم عليك أن تختار بين إنقاذ روح وبين توقيع الحضور في موعده، فعليك أن تختار التوقيع؛ لأن الروح التي منحتها بضع سنوات إضافية على الأرض وسط أحبابها لن تشفع لك عند موظف الدفتر الذي سيبلغ موظف الشئون القانونية الذي سيرسل مذكّرة لموظف الحسابات لاقتطاع اليوم الذي لم توقع فيه ❝
❞لكنه يعلم أن القاهرة لا تختفي، ستظل قاهرةً للزمن والبشر. لن يُعاقبها أحد على حُلمه الذي سحقته، ولا عن المرضى النفسيين الذين تمنحهم حق التحكُّم في مصائر الآلاف من الطلاب. ربما القاهرة هي التي تحوِّلهم إلى هذه المسوخ، لا أحَدَ يدخل القاهرة ويبقى إنسانًا.❝
❞«يا ابني «نسرين» مثل القُنفد، لا تنفع للحُضن ولا للبُوس»❝
❞أن تكون استثمار والدَيك الوحيد يعني أن تشعر بالذنب دائمًا.❝
❞ منذ اللحظة الأولى لركوب قطار الأقصر أنت لست طبيبًا ولا إنسانًا، أنت فرد بلا قبيلة تحميه، ولا عائلة تثأر لموته ❝