#شغف_الكتب_الموسم_الخامس

#فنجان_قهوة_وكتاب

المراجعة الثانية لدار أقلام عربية، والثانية عشر في المسابقة🫶.

..................

مراجعة بالعامية علشان حاسة إني محتاجة اقول اللي نفسي فيه😄

بقالي من أول الشهر بصارع مع دار أقلام عربية اللي كانت أول مرة أقرأ من ترجماتهم السنة دي، بدأت في رواية المسخ من حوالي شهر ونص -قبل المسابقة- وحسيت إني مش قادرة أخلصها لأني حسيت بملل شوية، بس جات المسابقة شجعتني أخلصها وأعمل عنها ريفيو كمان!، نرجع لموضوع إني بصارع، الفكرة في إن أغلب الأعمال اللي شوفتها مترجمة في الدار فمش كل الروايات المترجمة فكرتها عجبتني فكنت بفتح رواية واقرا منها مثلًا 20% ومكملهاش وصلت في رواية 40% ومقدرتش أكملها! حقيقي مش عارفة سبب إني فتحت ٦ روايات ومقدرتش أخلص ولا واحدة، جات السابعة ثابتة بقى😂، الرواية مفيهاش الطابع المشوق، هو بيتكلم عن يوميات الابن اللي أبوه مش بيحبه وافتكرت أوي رواية "دوائر الساعي" بشخصية الاب اللي تكاد تكون شبه الأب في رواية "حياتي: قصة فتى من الريف"، كل رواية فيهم بتناقش موضوع بس طابع القسوة من الأب ونظرياته السطحية كانت موجودة في الروايتين، لو هنقول ليه بيحبه فهقول عارفين موضوع أبوها دكتور فهي أكيد هتطلع دكتورة؟ هو مكانش عايز ينساق ورا تقليدات العيلة الكريمة اللي كلها مهندسين وناس تعليمًا من علية القوم زي ما بيقولوا، كان عايز يشتغل الأشغال العادية، يتعب فيحصد تعبه بنفسه، يكد ويتهد في الأشغال الريفية ويجني أتعابه.

بنروح معاه علشان نشوف هيتعامل إزاي بعد ما ابوه طرده، هيشتغل فين؟ هيقابل مين؟ هيكون حاسس بإيه في الوقت دة وهو بعيد عن بيته؟

شايفة إنها رواية بتناقش كذا حاجة، تعامل الآباء بشكل خاطئ بسبب الانقياد وراء التقاليد والعادات المتوارثة، التفرقة بين الخاضع والمتمرد، واحد تمرد وعاش اللي عايزه وبإرادته والتانية عاشت خاضعة لرغبات الوالد في مشوار حياتها!

والريف أو القرية، حسيت إني في قريتي في سوهاج كدة وإني مع أهل فعلًا قرويين أو ريف، حبيت تصوير الكاتب للمجتمع دة بما أني مولودة فيه، رغم عدم حبي سوهاج بس حقيقي حقيقي وصف الكاتب حلو أوي ودفاعه عن الناس الريفية كمان في جزء محترم من الرواية.

دي المرة التانية أقرأ فيها حاجة لأنطون تشيخوف، التجربة الأولى أفضل بالنسبالي، وكانت قصة قصيرة ممتعة وعجبتني جدًا، دي حلوة بس يمكن طموحاتي كانت أعلى شوية بسبب أول واحدة فمقابلتش دة في اللي قريته أوي المرة دي.

سرد الكاتب مميز وجميل، حسيت بحشو أو أحداث مكانتش لازم تتحط أوي بس توتالي حلو عادي.

الترجمة كانت حلوة أوي أوي، حسيت أوقات كتير إني بقرأ لكاتب مصري مش رواية مترجمة، فحلو جدًا دة