أم كلثوم هرم مصر الرابع
أم كلثوم الأسطورة التي لن تتكرر. مين فينا مبيستناش حفلتها كل يوم. مين مبيتسلطنش لما يسمع صوتها وهو جاي من بعيد، من قهوة بلدي، من راديو قديم. مين مبيتهيألوش إنه بيحب لما بيسمعها بتغني للحب حتى لو مفيش حاجة ولو حد قفشك وأنت سرحان يعطيك النظرة 😁 ومتكملش حلاوة العيد غير وصوتها بيرن ويقول يا ليلة العيد آنستينا 🥹
أم كلثوم حالة يستحيل الزمن تكرارها. مكنتش مجرد مغنية عظيمة، هي أيقونة، رمز ثقافي واجتماعي عميق التأثير، نسخة واحدة بس. اجتمع الملايين في مصر والعالم على حبها؛ من الأمراء والملوك والساسة إلى عامة الشعب. كانت صوت للثورات، والانتصارات، وما زال بريقها في الذاكرة الجماعية العربية حتى الآن.
في كتاب أم كلثوم من الميلاد إلى الأسطورة للكاتب حسن عبدالموجود بيعرفنا على جوانب جديدة من حياة كوكب الشرق. هو مش مجرد كتاب عن سيرتها، لاء ده بحث وتقص تاريخي وتوثيق أدبي بياخدنا الكاتب فيه في رحلة ل سنين كتير أوي ورا، من أول ميلادها، وبنقف على محطات ومواقف كتير جدا وفاصلة في حياتها. كأنك بالظبط قاعد مع حد من زمانها بيحكيلك 50 حدوتة عنها.
50 حكاية مستقلة في 50 فصل بتوضح جوانب مختلفة من حياتها، إنساني، واجتماعي، وثقافي، ووطنية لا مثيل لها في شخصها. بتشوفها من منظور آخر أكتر من مجرد صوت أسطوري. سيدة صنعت المجد من اللاشيء، وسابت إرث خالد لسه عايش لحد الآن في وجدانا.
بيحكي الكاتب بلغة عربية فصحى سلسلة، وبأسلوب حكي وسرد يخلي النص مليان حياة بعيد تمامًا عن الجفاف الأكاديمي.
قصص وشخصيات دارت في فلكها، ما بين أهلها، والمشايخ اللي رافقوها منذ بدايتها، المقربين منها، أعضاء فرقتها، رجال الدولة من الملوك والرؤساء والوزراء، الجمهور والمعجبين من جميع الطبقات، الصحافة والنمامين،والعاشقين للست مفطوري القلب. تحب منهم شخصيات وتشفق على آخرين، كما تقول الست أهل الحب صحيح مساكين.
مكنش مجرد حكي لأحداث متنوعة لاء ده بعد آخر للمواقف. بتفهم وتغوص في شخصيتها وتعيش معاها مشاعرها الإنسانية، قوتها، ووحدتها، قلقها، وذكائها الاجتماعي في المواقف مع احتفاظها بأصولها الريفية.
وزي ما عرفنا الكتاب جوانب كتير من شخصية أم كلثوم. وإنها شخصية رزينة ومنضبطة كلها إنسانية. عرفنا كمان جانب آخر مختلف، لكنه أكتر جانب ضحكني واللي كتير ما يعرفهوش عنها إنها كانت تموت في القلش، ومفيش حد عدى سليم من هزارها. كانت شخصيتها تجمع بين الجد والفكاهة الغير مبتذلة بأسلوب مميز وذكي جدا.
ومن خلال المحطات دي، بنتابع تطور شخصية أم كلثوم، من طفلة ريفية إلى أسطورة فنية خالدة، مع التركيز على العوامل النفسية والاجتماعية والثقافية اللي شكلت التحول ده وفضلت لحد دلوقتي عايشة معانا.