واحدة من أجمل الروايات اللي قرأتها في حياتي وأطولها!
تجاربي مع الروايات التاريخية قليلة جدا، ولكنها مميزة بصراحة، فكرة إني عارفة القصة مُسبقا، ومستنية أعرف الكاتب هيضبط الحبكة إزاي كانت ممتعة جدا بالنسبالي!
بل إنّي ككاتبة كُنت مُنبهرة وبقرأ عشان أتعلم فعلا إزاي ممكن الكاتب يطوّع القصة تحت إيده، يلتزم بالأحداث كما وردت في النصوص الدينية، وفي نفس الوقت يبقى كل حاجة مُنسجمة مع الرواية وشخصياتها!
الوصف بالنسبالي دايما بيكون المعضلة الأساسية في الروايات التاريخية تحديدا، قليل جدا لما بتكون الرواية قادرة تغذّي ذاكرتي البصرية بالكلام بس، وأعرف أبني أجواء الرواية في دماغي ، بس المرة دي أنا راسمة لكل مكان صورة في دماغي، من أول برية سين ، وعصيون جابر، لحد برية فاران، وسقيفة العنب في يثرب ، وكل تفصيلة اتذكرت بسلاسة ووضوح، بلغة قوية، مفيهاش استعراضات، وواضحة ومفهومة!
تطوّر شخصية شمعون بين أول الرواية وآخرها مرعب، مرعب لأني متخيلة حجم المجهود اللي يتطلبه بناء شخصية متغيرة ومتطورة من حين لآخر بالشكل ده، عشان يجمع في الآخر بين مآثر كل الأبطال اللي صاحبوه في الرواية، يمكن الشيء الوحيد اللي أزعجني بعض الشيء هو إهمال ذكر السياق الزمني شوية، ولكنّي قادرة أستوعب مبررات الفكرة دي.
عاجبني جدا كمان الصفحة الأخيرة اللي اتذكر فيها مين هم الشخصيات الحقيقية ،
في الحقيقة دايما الروايات التاريخية بقرأها بهدف المتعة، مش بحس أبدا إن فيها من الشفافية اللي تخليني أعتمدها كمصدر لمعلوماتي، لكن المرة دي فعلا كنت مطمئنة بشكل أو بآخر، خصوصا بعد ما انتبهت إلى تجنب الكاتب لحدوث أي حوار مباشر مع سيدنا موسى، إلا ما جاءت به النصوص، وده أكسب الرواية قدر كبير من المصداقية عندي.
ختاما، بنصح جدا بقرائتها، رواية ممتعة لأقصى درجة، عرفت فيها إجابات على تساؤلات كتير، وأهابني بشكل أو بآخر إن تساؤلاتي هي تساؤلات شمعون الصغير، كنت محتاجة أقرب فعلا عشان أفهم طبيعتهم وليه استحقوا كل ما جرى فيهم!
مبسوطة إنّ الرواية كانت رفيقة لليالي الامتحانات العصيبة ! ❤️