داخل مصحة نفسية يبدأ الراوي حكاية مش بس عن نفسه لكن عن عالم كامل من البشر اللي جمعتهم الجدران المغلقة والوجع المشترك هناك نتعرف على مجموعة من الشخصيات الغريبة والمختلفة إبراهيم عياد، كريم الرئيس، مصطفى رُزّة النجار غليظ الطبع، هاني نوڤا صاحب الأنف الكبير والمذعور على طول، الشاذلي، محمود أبو الرُكَب، بهاء عصفور، أمين سنقر، وغيرهم

ومعهم طاقم التمريض سعد تايك، سماح تسلخات، سيد مهجة، عم عيسى، وعواطف… أسماء قد تبدو كاريكاتورية لكنها مرسومة بحس إنساني ساخر يخليك تضحك وتتوتر في نفس اللحظة

السرد مش بيتوقف عند المرضى بس لكن يمتد لحكايات جانبية أغرب زي قصة الأستاذ صابر أبو لبن المختبئ في الحيطان والمسرحية ومشاهد سقوط العراق وكل ده بيتداخل مع مواقف كوميدية سوداء تخفف الوجع من غير ما تنفيه

الرواية بتلعب بذكاء على الحد الفاصل بين الجنون والعقل، بين السخرية والألم، وبتخليك دايمًا تسأل مين فيهم المريض فعلًا؟ اللي جوه المصحة؟ ولا العالم اللي براها؟

أما الغلاف، فهو أول ضربة مباشرة للقارئ وجه إنساني استُبدل بورقة مشتعلة وكأن الرسالة واضحة الهوية بتحترق والإنسان بيتآكل أو بيتحول لرماد تصميم الغلاف أقرب لبورتريه لكن بدل الملامح في احتراق، يخليك واقف قدامه مش علشان تتأمله، لكن علشان تسأل نفسك

من أنا؟ وماذا يتبقى مني عندما تحترق ملامحي؟

اختيار الألوان الأخضر الداكن في الخلفية والإطار الأحمر الغامق بيدي إحساس تقيل ومقلق كأن الرواية من البداية بتقولك إنها مش قراءة سهلة لا نفسيًا ولا فكريًا

وربما تلخص الرواية روحها الجملة دي:

❞ أفضل استراتيجية لخداع العدو هي اللجوء لأكثر الحلول سذاجة… لن يتوقع إقدامك على عمل غبي ❝

بورتريه لأبي العلا البشري رواية ساخرة، موجعة، وفلسفية في عمقها، بتتكلم عن تفكك الذات وفقدان الهوية ومحاولة الإنسان النجاة وسط عالم يبدو أكثر جنونًا من أي مصحة

#بورتريه_لأبي_العلا_البشري

#باهر_بدوي

#مسابقة_أبجد

#حصاد_العام

#أبجد

#فنجان_قهوة_وكتاب

#مسابقة_حصاد_العام_مع_أبجد_وجروب_فنجان_قهوة_وكتاب