ممتازة ✨👌
كل ما أعجبني في الجزء الأول موجود بالإضافة لشوية حاجات خلت الحلو يكمل..
أولا : المرة دي القضية واحدة كبيرة وهنا كانت متشعبة كفاية والغموض فيها لذيذ وطبعا التشويق يخليك تكملها في جلسة واحدة عشان تعرف تخمينك للقاتل صح ولا لاء.. اللي بالمناسبة انا فشلت في تخمينه المرة دي 😂
ثانيا: نوح الألفي.. كتابة الشخصية اتوسعت بإضافة البعد الدرامي ليها بجانب البعد المهني الجاف والمتقد الذكاء.. في الجزء ده هانعرف اكتر عن ماضي نوح وعلاقته بوالدته و أزمته وخلافه معاها.. علاقته بأخته نادية (اللي بتفطسني من الضحك😂) وجدته الجميلة ❤️.. وهايوضح اكتر صراع نوح الداخلي بين شخصية الضابط الجاف القاسي أحيانا المنغلق على نفسه و أسراره.. وبين نوح اللي بيحاول يبني حياة مختلفة مع دليلة ويخرج من عزلته معاها ويحاول يبقى الشخص اللي هيا تتمناه.
ثالثا: علاقة نوح وصديقه قطز المحببة لقلبي.. المرة دي علاقتهم بيبان فيها شوية خلافات وأسرار.. بنتعرف اكتر على عمق علاقتهم وقوتها.. طبعا بجانب حسهم الفكاهي اللطيف 😀
وأخيرًا : الجريمة اللي تبان في الأول واضحة ولكن مع كل فصل تظهر تفاصيل جديدة ومعلومات جديدة تخليك تعيد ترتيب حساباتك وتدرك ان الموضوع مش سهل كدة.. وكل ده بأسلوب سهل وجميل ومافيهوش ملل نهائي. واضح في الجزء ده تطور الكاتبة عن الجزء الأول وأعتقد الجزء الثالث هايكون أفضل وأفضل.
رواية تشويق وجريمة وغموض ودراما وحتة رومانسية كل ده يخليها ميكس رهيب وممتع.