مقدمة لابد منها..

انا لما بجي اقرا رواية او كتاب لحد بحبه ببقي داخله علي استحياء كده وكأن لسان حالي بيقول للمؤلف انبي يا شيخ متكسر بخاطري ولذلك لما عرفت ان احمد خالد توفيق نزل رواية جديدة دخلت برجلي اليمين وابتديت اقرا ويسعدني اني اقول ان خاطري الحمد لله بخير ومكسرش..

خلونا نبتدي رواية في ممر الفئران تعتبر متاخدة من فكرة واحدة من اساطير ما وراء الطبيعة بعنوان "اسطورة أرض الظلام" ولكن فكرتها وشخصيتها اكبر واوسع بكتير.. الكتاب بيتكلم عن عالم تدريجيا الناس فيه ابتدوا يعيشوا في الظلمة وتأثير وملابسات ده علي حياتهم خلونا نتكلم بالتفصيل..

-الاسلوب كالعادة الاسلوب المعتاد لدكتور أحمد مخيبش امالي.. اسلوب خفيف سلس بينقلك وينط بيك من فكرة لفكرة ومن شخصية لشخصية من غير متحس بولا مطب في الطريق وتحس ان الموضوع طبيبعي وسلس... بالاضافة للجمل والتشبيهات الي بتخليك تقف عندها وتعطل من كتر ما بتحس بالي بتقراه او ان الجملة بتعبر عن حاجة انت حاسسها.. حاجة عجيبة ولكن طبيعية جدا في كتب دكتور احمد انك تلاقي واحد واصف مشاعرك بشكل احلي وادق من ما انت عمرك ما وصفت.. ولذلك شابو للكاتب..

-الشخصيات: الشخصيات كانت متنوعة ومختلفة مما ساعد علي عدم احساسي بالملل انا ارتبطت جدا بشخصية رامي وشرقاوي وحسيت انهم بيعبروا عن مشاعري في العديد من المواقف الحياتية الي بقابلها مما خلاني مستمتعة بالكتاب ومتونسة بيه وحاسه اني مش عايزاه يخلص..

-الواقعية في سرد ومسار الاحداث.. احد الحاجات الي بتقفلني من الكتب ساعات لما فجأة الكاتب يقرر انه ينهي الموضوع علي وعاشوا في تبات ونبات واتلموا وخلص الشتات بحس اني تم استحماري نوعاً ما.. لكن الحمد لله الرواية واحداثها واقعية ومفيهاش الافورة بتاعت وانتصر الشر علي الخير عشان كده وخلاص..

-القفلة: الحقيقة بالرغم من اني عجبتني القفلة الي اني حسيت انها كانت محتاجة شويه مناقشة او سوري في بلدية التعبير فرش يعني لو 30 او 40 صفحة كده كنوع من انواع المنطقة للموضوع والعوامل النفسية وراها كان ممكن يطلع منها زبد كويسة وده الي خلاني ادي الكتاب 4 من 5..

غير كده هو كتاب برنس في نفسة وانا برشح الناس تقراه..

سو ريفيو لرواية في ممر الفئران 4 من 5