#سو_ريفيو لرواية #الداما للكاتب Mohamed Sadek - محمد صادق
طيب انا في العادي بحب اقول الرواية بتتكلم عن ايه لكني المرة ديه مش هعمل كده لكني هبتدي بحاجة انا حابة اقولها الرواية ديه مش لكل الناس وديه حاجة انا مش بقولها عشان اروج او اخلي الناس تقرا الرواية لكنها بالفعل لأنها رواية تقيلة ومش للأصحاب القلوب الضعيفة علي الأطلاق
انا الحقيقة فرحانة ان الكاتب صنف الرواية انها 18+ وبتتناول مواضيع متنوعة من العنف الجسدي والجنسي والنفسي والأنتحار لذلك وجب التنوية يلا بينا..
ليه انا عجبتني الرواية:
اولاً: الوصف والسرد: انا طول عمري بقول علي محمد صادق انه بيحب يدخل في معاميع النفس البشرية يطلع الي موجود جوانا كبني ادمين في اظلم ركن جواك ويحطه قدامه ويسيبك.. المواضيع المطروحة اقل ما يقال عليها انا جرئية ومحتاجة تتطرح بشكل واضح وصريح وفج
وصفي لطريقة سرد صادق ووصفه للأحداث لا يعبر عنه غير كلمة في اللغة الانجليزية وهي visceral وهي بتستخدم عند وصف الاشياء الغير فكرية او الغريزية المشاعر الخام أو الأولية الي لما بتقراها بتحس بحاجة مش في قلبك في امعائك وتحس بيها وهي بتتلوي في غضب من الي انت بتقراه وبتعرضها له.. ده دائماً شعوري وانا بقرا وصفه للمشاعر والتجارب المطروحة. الرواية بتنقل تجارب واحداث عن العنف الجسدي والجنسي والمعنوي الي بنتعرض اليه في اغلب الأحيان من اقرب الناس لينا ومع كل فصل وانت رفضك لأحداث الي انت بتقراها بيزيد يديك الكاتب قلم علي وشك باحصائيات وارقام تحسسك بمدي هلع الي انت بتقراه لدرجة اني كل فصل كنت ببحث علي جوجل لأكتشف بهلع انه الارقام ديه صحيحة ليس فقط في بلدنا الحبيب لكنه في العالم ككل مما ادي انه مع كل فصل تصديقك للأحداث المروعة بيزيد وبيوصلك بكل تفاصيله القاسية
ثانياً الشخصيات: طريقة سرد وتقديم الشخصيات قايمة علي طريقة البازل كل فصل بتعرف تفصيله كل تفصيله بتقربك وتفهمك ديناميكة الشخصية الي قدامك بشكل صلب وملموس لينتهي بيك الأمر في النهاية انك حابب\كاره\حاكم او عايز تموت الشخصية الي قدامك رحلة بتنتهي انك مرتبط سواء بحب او بشفقة او بتلذذ سادي مع كل الشخصيات
ثالثاً: القفلة والحوار الأخير: اصلاً طول الرواية الكاتب بيسألك اسئلة عاملة تحطك قدام المريا، بتعرفك علي احكامك وعلي انحيازاتك وعليك انت كبني ادم فالي بيحصل تلاقي نفسك بتلطم في صمت لما تقفش نفسك بتعمل حاجة ولا اتنين من الحاجات الي بتتوصف وتشوف في هلع مدي تأثير ده علي الأخريين وتحس بانك بتتعري قدام نفسك وعقلك بشكل غير محسوس لكنه بياكلك علي وشك علي سهوة
يسكت الكتاب علي كده لا ميسكتش يجي ابن الحلال وياخد القصص القصيرة الي مربوطة في القصة الكبيرة الي فيها كل الهلع والتفاصيل الي ورتك المعاميع المذكورة اعلاه ويقوم قايلك انها قصص حقيقية لناس عاشوا ومنهم من نجا ومنهم من لما ينجوا من هذا الهراء والقسوة الأنسانية المتناهية
رواية في رأيي المتواضيع سابتني بأعظم سؤال ممكن الرواية تسيبك معاه انت عايز تبقي مين؟ عايز تعامل البني ادمين ازاي؟
ورداً علي هذا السؤال انا سارة قررت اني في وسط كل هذا الهراء والقسوة انا هحاول ابقي رفيقة، هحاول محكمش، هحاول اسمع قبل ما ارد وهحاول افهم قبل ما اعمل نفسي قاضي وجلاد وهحاول اني افكر نفسي زي ما قال الكاتب قبل كده "وانت تحكم علي الناس ليه انت مال اهلك" لو معندكش الرفقة والشجاعة انك تبقي حقاني وتقف مع الضحية يبقي اقل واجب انك تسكت ومتبررش للجاني
#سو_ريفيو لرواية #الداما 4.5 من 5 وده لقسوة ولكن صراحة السرد
دمت مبدع يا صديقي ووالأهم دمت صادق