مقدمة لابد منها

انا كسارة بقالي كتير بعاني من الـ reader's Block

وهي من الأخر زي ما الـ Writer’s Block بتيجي للكُتاب لما مبيعرفوش يكتبوا ديه النسخة الي بيتيجي للقراء لما مبيعرفوش يخلصوا رواية ولذلك انا ممتنة للكاتبة الموهوبة

الي بفضل نوح الألفي وفقره خرجتني من عنق الزجاجة ده..

خلونا نبتدي..

الموضوع ببساطة بيتكلم عن نوح الألفي، ضابط مباحث من فوق الوش حياته تبدو انها عادية بيحقق في جرائم قتل مع صديقه ابو دم خفيف قطز ومعروف عنه انه لو القضية ملعبكة يبقي مفيش حد هيجيبه اخرها غير نوح بما أنه من اكفأ الضباط في القسم لكن ما لا يعرفة العديد هو ان نوح بيجب اخر كل قضاياه لأنه عنده القدرة علي الكلام مع ارواح الميتين او الأطياف زي ما هو بيحب يسميهم والموضوع بينطلق من هنا..

الكاتبة عمله الموضوع علي هيئة كتابين قضية ست الحسن عبارة عن 3 قضايا في بعض اما الرواية التانية وهي قضية لوز مر بتتكلم عن قضية واحدة وهو ده الترتيب الزمني الصحيح للأحداث..

طيب ليه عجبوني الروايتين او بشكل ادق المجموعة القصصية الاولي والراوية التانية؟

لأن الكاتبة صايعة اه وربنا زي ما بقولك كده، في اول عمل قضايا صغيرة منتورة مكتوبة بحنكة وحبكتها صلبه لكن التركيز علي عالم المحقق ذات نفسة دنيته، اهله، اصحابه وخلافه لذلك من غير ما تاخد بالك تضرب صحوبيه مع الجدع وترتبط بيه هو وأهله وتخش جواهم بقلقهم وخوفهم وحياتهم وعيالهم وطبخم والمرايال الي بيلبسوها في المطبخ

قوم ايه اول ما بتخلص الكتاب الولاني بتبقي عندك رغبة تطل علي الجدع واهله تشوف جري لهم ايه قوم تسحبك الكاتبة للرواية التانية بمنتهي الأريحية والسلاسة

الشخصيات: مكتوبة بسلاسة ومن غير افورة مما بيمكنك بسهولة انك تحبهم وتخاف عليهم لأنك بتحس انهم زيك

الحوار مكتوب بخفة دم غريبة انا ضحكت كتير جدا وشرقت وانا بشرب اكتر من عدم توقعي للحوار الي ما بين الشخصيات بالذات نوح وقطز ديناميك الصداقة الي ما بينهم كلنا شفناه وحبيناه في حياتنا.. الشخصيتين المتباينين الي كلنها عشناهم او شوفناهم ولسان حالنا دايماً بعد ما بالأبتسامة البلهاء بتروح من علي وشنا بنبتدي نهرش في دماغنا ونتسائل "هو ازاي الجوز دول صُحاب؟"

أخيراً وليس أخراً اكيد، انا مزهقتش اه وربنا يا جدعان مزهقتش قريت رواية في يوم واحد من كتر ما كنت عايزة اعرف مين فين ايه ومن هو القاتل يا أوغاد.. وعرفت واتبسطت ولذلك شاكرين يا أستاذة ميرنا مش بس عشان رجعتني اكل رواية في يوم

لكنك خلتني ارجع اكتب ريفيوز تاني عشان اقول للبني ادمين اقروا الكتب ديه يا جدعان..

هتنبسطوا..

حقيقي شابو 🙏💚📖