الرواية لطيفة في المجمل .. لكن الحوار كتير جدا جدا جدا وبالعامية وفيه نسبة استظراف عالية بتفصل القارىء.. الفصل الاول والتاني (بتوع العيد ميلاد) ما لهمش لازمة خالص، لو الهدف منه التعريف بآسيا كان ممكن الاكتفاء بصفحتين مش عشرين.. الsubplot بتاع فتون ما لوش داعي برضو .. وكمان ظهور والدة نوح والحدث المحيط بها (رغم ان الحوار في المشهد ده تحديدا كان اقوى حوار في الرواية).

الاسماء كتيرة جدا جدا جدا واحيانا بدون شخصيات ، مجرد اسماء (وكمان ثنائية وساعات ثلاثية) الاسماء دي بتلخبط القارىء .. طارق وطاهر وفيه واحد منهم متكرر مرتين اب وابوه ، وغادة وداغر وعطية و العروسة اللي كان اسمها ثنائي هي وجوزها وهما اصلا ما ظهروش ، كتيييييير جدا .

برضو موضوع جليلة اخت دليلة ده ايه فائدته ، مجرد subplot يكبر الرواية بدون انه يثير فضول القارىء او يخلق اي نوع من التعاطف .

الرواية مليانة احداث فرعية غير جذابة ولا تصب في مجرى القضية ، حقيقي انا كقارىء مش مهتم بيها رغم انها بتزود بعد جديد للشخصية لكن لو شيلته مش هيأثر نهائي على الاحداث اللي تهم القارىء.

معلومات الطب الشرعي فيها حلوة جدا ومتعوب فيها ، الكاتبة بذلت مجهود كبير فيها ، وهي احسن حاجة في الرواية، ولو الرواية كانت اكثر جدية كانت هتكون اروع.

لكن الرواية مش مملة (باستثناء اول فصلين وجزء فتون) .. وانصح بقراءتها بغرض تمضية وقت لطيف