اقتباسات أحمد فؤاد نجم

هما مين واحنا مين

هما الأمرا والسلاطين

هما بيلبسوا آخر موضة

واحنا بنسكن سبعة ف أوضة

هما بياكلوا حمام وفراخ

واحنا الفول دوّخنا وداخ

هما بيمشوا بطيارات

واحنا نموت في الأوتوبيسات

هما حياتهم تمضي جميلة

هما فصيلة واحنا فصيلة

حادي يا بادي يا عبد الهادي

راح تفهم قصد الغنوة دي

لمّا الشعب يقوم وينادي

يا احنا يا هما في الدنيا دي

حزّر فزّر شغل مخك

شوف مين فينا حيغلب مين

بكرة لما قمركو يطلع

والشمس تطلع

ونهاركو يطلع

حيقولوا كان في المكان دا ناس

فيهم طيابة

وفيهم حماس

وكانوا آخر الأمر

ناس

وكان زمانهم سجون

وكانوا

مابين سجونه وأمريكانه

وبين ضباب الطريق حيارى

ماحد قادر يشوف مكانه

حتقولوا كانوا

وياما كانوا

وياما شربوا

وياما عانوا

وياما جالهم

وياما جيلهم دفع

وكان التمن أمانه

وياما ناس فى المسيرة

مشيت

وناس ف نص المسيرة خانوا

حتقولوا كانوا

أو ياما كانوا

لكن ح يبقى في الأمر حاجة

إن اللي عربد

ما سابش حاجة

وساب كلابه

على كل حاجة

تهبش وتنهش

فى كل حاجة

ماقدرش يقتل في أي حاجة

روح التفاؤل

بكل حاجة

ما رأيكم دام عزكم

يا أنتيكات

يا غرقانين

فِ المأكولات والملبوسات

يا دفيانين

ومولعين الدفايات

يا محفلطين

يا ملمّعين يا جيمسنات

يا بتوع نضال آخر زمن

ف العوامات

ما رأيكم دام عزّكم

جيفارا مات

لا طنطنة

ولا شنشنة

ولا إعلامات واستعلامات

عيني عليه ساعة القضا

من غير رفاقه تودّعه

يطلع أنينه للفضا

يزعق ولا مين يسمعه

يمكن صرخ من الألم

من لسعة النار فِ الحشا

يمكن ضحك

أو ابتسم

أو ارتعش

أو انتشى

يمكن لفظ آخر نَفَس كلمة وداع

لَجل الجياع

يمكن وصية للي حاضنين القضية

بالصراع

صور كتير ملوْ الخيال

و ألف مليون احتمال

لكن أكيد و لا جدال

جيفارا مات موتة رجال

غرامي في الحروب يسبق كلامي

وأملي فى الشعوب يخلق غُنايا

وعشقي للكلام غالب سكوتي

وكرهي للسكات جالب شقايا

ممنوع من السفر

ممنوع من الغنا

ممنوع من الكلام

ممنوع من الاشتياق

ممنوع من الاستياء

ممنوع من الابتسام

وكل يوم في حبك

تزيد الممنوعات

وكل يوم باحبك

أكتر من اللي فات

حبيبتي يا سفينة

متشوقة وسجينة

مخبر في كل عقدة

عسكر في كل مينا

يمنعني لو أغير

عليكِ أو أطير

بحضنك

أو أنام

في حجرك الوسيع

وقلبك الربيع

أعود كما الرضيع

بحرقة الفطام

حبيبتي يا مدينة

متزوقة وحزينة

في كل حارة حسرة

وف كل قصر زينة

حبلت الأيام سنين

ولدت الأيام دهور

دامت الأيام لمين

وحِّدوا المولى الغفور

صلّي ع اللي في القيامة يشفعك

واصحى ياللي نمت من اللي بيوجعك

واكشف اللي بيؤلمك وبيمنعك

قولي يا جارة

قول يا جار

مهما طال الليل وجار

كل جرم وله مدار

والكواكب دوّارين

وحِّدوه يا مؤمنين

صحّي نومك ياسطى فكري ياللي ناسي

هلّْ يومك ياسطى مرسي ياللي راسي

يا حبايب مصر يا أهلي يا ناسي

اللي يعشق بالسهر حتماً يقاسي

اصحى يا نايم كفاية

وحِّد الإنسان معايا

طالت الليل الرحايا

والحدادي قلقانين

وحِّدوه يا مؤمنين