اشجار لا تظلل العاشقين

نرمين نحمدالله

دار دون للنشر والتوزيع

527 صفحة علي ابجد

2024

⭐⭐⭐⭐

الماضي بيلعب دور خفي لكنه حاسم علاقات الطفولة، الحرمان العاطفي، الخذلان الأول صدمات الطفولة مش لحظة عابرة بنعديها ونكبرهي جروح بتكبر معانا بتغير شكلنا من جوه وبتظهر في تصرفاتنا وإختياراتنا من غير ما نحس بتجعل من اصحابها شخصيات هشة من الداخل أحيانًا بنعيد نفس السيناريو مش لأننا بنحب الألم لكن لأننا متعودين عليه بنختار اللي يشبه جروحنا ونحاول نداوي القديم بحب جديد بس بنفس الأدوات المكسورة

زي علاقة أدم وأرجوان

الطفل اللي اتربى على أب قاسي أو غايب كبر وهو شايف الرجولة يا خوف يا سيطرة فإما يبقى شخص مهزوز دايما مستني القبول أو نسخة تانية من نفس القسوة اللي وجعته

والطفل اللي أمه كانت باردة او مشغولة أو مجروحة لدرجة إنها ماعرفتش تحتوي كبر وهو مش واثق إن الحب ممكن يكون آمن دايما شاكك دايما حاسس إنه زيادة عن اللزوم

الفقر مش بس قلة فلوس الفقر صدمة

إنك تكبر وأنت حاسس إنك أقل إن أحلامك لازم تتحجم إن أبسط رغباتك رفاهية كتعليم او معالجة مريض من اقرب الناس ليك ولكن لاتملك اي شئ

ده بيطلع عقد نقص خوف دائم من المستقبل جشع أو بخل عاطفي ومادي أو بالعكس تهور وصرف عشوائي كأنك بتعوض حرمان قديم العنف الأسري بيكسر الإحساس بالأمان من جذوره الطفل اللي شاف ضرب، صريخ، إهانة، كبر وهو رابط الحب بالألم، ومتعود إن الصوت العالي طبيعي، وإن الإهانة جزء من العلاقة فيا إما يقبل العنف يا إما يمارسه

والمرض مرض الأب أو الأم أو مرض الطفل نفسه بيخلق عبء نفسي تقيل طفل اتحط بدري في دور الكبير شال مسؤولية مش سنه فكبر وهو تعبان قلقان حاسس إنه لازم يكون قوي دايما ومفيش مساحة للضعف

أكتر حاجة موجعة في صدمات الطفولة إنها غير مرئية

الناس بتشوف النتيجة مش السبب

بتشوف العصبية، البرود، الخوف، التعلق المرضي بس نادرا ما حد يسأل إيه اللي اتكسر زمان؟

الشفاء مش في إننا نلوم نفسنا ولا أهلنا طول العمر الشفاء يبدأ لما نعترف إن في وجع حقيقي حصل وإن الطفل اللي جوانا لسه محتاج يسمع أنت ماكنتش غلطان أنت كنت طفل بس

أربع نساء كل واحدة منهم تبحث عن شئ مختلف الحب، الامان، العائلة، عدم الفقد ولكنهم وقعوا في فخ سوء الاختيار

أشجار لا تظلل العاشقين رواية عن الخذلان المقنع بالحب وعن العلاقات التي نختبئ فيها فنحترق أكثر رواية تحسبها رومانسية لكنها تفاجأك بأختياراتك وبعلاقات كنت فاكر انها أمان لكنها طلعت وهم رواية كل صفحة فيها تخليك تسأل

هو ده حب؟ ولا تعلق؟

أمان؟ ولا خوف من الوحدة؟

الشخصيات حقيقية جدا مش مثالية مش دايمًا صح شخصيات بتغلط بتتعلق بتسكت عن وجعها وبتفضل واقفة تحت شجرة فاكرة إنها بتظللها لكنها في الحقيقة سايبة الشمس تحرقها

وكل ده مجرد محاولة يائسة للنجاة من الوحدة رواية بتقولك بوضوح إن في علاقات إحنا اللي بنختار نكمّلها رغم الأذى وبنقنع نفسنا إنها حب مع إنها مجرد خوف من الخسارة أو الوحدة او الفقد

الرواية خلتني أفكر إن الحب مش دايما مشكلة أحيانا المشكلة إننا بنختار الغلط أو بنكمل في علاقة انتهت من زمان بس إحنا اللي مش عايزين نعترف

خلصت الرواية بإحساس مختلط بين الحزن والوعي مش كل الروايات لازم تفرحنا بعض الكتب دورها إنها تفوقنا والرواية دي كانت واحدة منهم

أشجار لا تظلل العاشقين مش رواية للهرب دي رواية للمواجهة

ولو خرجت منها متضايق شويةيبقى وصلت