ريفيو رواية الألم يحصد الآن.

عجبني العنوان وتصميم الغلاف وشدوني وتحمست للإشتراك في المسابقة قبل حتى ما أعرف موضوع الرواية

لما عرفت أنها رواية نفسية ترددت شوية لأن عندي حكم مسبق على الروايات النفسية ومكنتش بقرأها بس قررت أكمل التحدي وانفتح على التجربة وحاولت اقرأها بدون أحكام مسبقة 😀

بس مبسوطة أني اتعرفت على قلم دينا ممدوح ومتحمسة اقرألها تاني🤗

الرواية بتبدأ بطبيب نفسي بيقرر يحكي حكايات ٦ أشخاص كانوا بيترددوا على عيادته على لسانهم بدون ما يوضح هو دوره ايه بس بيأكد انه نجح معاهم جدا بشكل ساعدهم وساعده!

تعليقات الطبيب وهو بيستعرض ملفاتهم كانت مريبة بالنسبالي ورغم كده أنا اتفاجئت بالتويست اللي في نهاية الرواية.

اقتباس لكلامه اللي اعتبرته مريب👇🏻

❞ وأعتقد أن تلك ميزة عملي، أعلم الكثير من الأسرار عن الآخرين ولا يعلمون هم عني أي شيء، وهذا يصيبني بالنشوة والاستمتاع. ❝

الشخصيات الستة اشتركوا في المعاناة، كلهم كانوا بيعانوا بشكل أو بآخر، رغم أن فكرة الرواية أن كل شخصية بتمثل خطيئة من الخطايا السبع المشهورة رسم الشخصيات أظهر التناقضات جواهم، في حركة بين الواقع وبين الفضيلة اللي نفسهم يوصلولها،كان في نية للتغيير خلتهم يزوروا طبيب نفسي.

حتى رضا اللي كان أذاه لغيره مش لنفسه ودمر حياة صديقه المقرب هادي كان جواه تناقض كان ممكن ينقذه من الإستمرار في الطريق ده.

❞ ومنذ تلك اللحظة بدأت أتصرف بتصرفات لم يكن جزء مني يرغب فيها أبدًا، فهذا صديقي الأقرب! وجزء

آخر مني كان يقنعني أنه يستحق ذلك ❝

لما تروح لمعالج عشان يساعدك ده معناه أنك فعلا مش عايز تكمل طريقك ده، بس لو المعالج كان حكمه عليك أصلا أن مفيش أمل أنك تتغير فطبيعي مش هتتحرك ناحية التوبة ولا التغيير

❞ حتى وإن نويتَ التوبة، فهناك بعض الخطايا منسوجة بجلدك، تسير داخل شرايين قلبك، تأكل من روحك"

بالنسبة لشخصية الطبيب النفسي الحمد لله أنه مطلعش طبيب نفسي وطلع نصاب عشان الأطباء النفسيين مش ناقصين ستيجما ودي أكتر نقطة عجبتني في الرواية 😀.

#الألم_يُحصد_الآن

#دينا_ممدوح

#مسابقات_مكتبة_وهبان

#مسابقة_ريفيوهات_الألم_يحصد_الآن