"أمرت النيابة بحبس المتهمة هاجر حسن عفيفي أربعة أيام على ذمة القضية."
أسم الرواية: جريمة السيدة (هـ)
المؤلف: نهى داوود
هاجر ست زي ستات كتير..
موظفة و زوجة و ام عايشة حياة روتينية عادية جدا ما بين بيتها و شغلها...
لكن اللي مش عادي ان بين يوم و ليلة حياتها كلها تتقلب و تتهم بقتل هاني زميلها في الشغل اللي لقوه مقتول في جراچ مقر العمل!!!!
هاجر فعلا كانت سهرانة ليلتها في الشغل و الشهود شافوها و هي خارجة من الجراچ (مسرح الجريمة)،، بس الغريب انها كانت قلقانة و خايفة زي ما تكون هربانة من حاجة !!! لأ و المفاجأة بقى ان بصماتها على أداة الجريمة كمان !!!!!
مع كل فصل بتتطور الأحداث و بنكتشف ان الجريمة مش بس جريمة قتل! دي جريمة أسرار كتير مستخبية..
يا ترى ايه الحكاية!!
الحبكة بوليسية شيقة تشد من اول صفحة، بالإضافة لشوية تفاصيل انسانية و إجتماعية لمواضيع مهمة زي أهمية الصداقة في حياتنا و العلاقات المعقدة بين طبقات المجتمع المختلفة و ضغوط الحياة و ازاي بتسبب فتور في العلاقات... كل التفاصيل دي اضافت بُعد إنساني لطيف للرواية خفف من حالة الترقب اللي بتزيد مع الاحداث..
اللغة فصحى للأحداث و عامية للحوار والسرد متوازن ما بينهم بدون ملل
دي كانت اول رواية اقرأها لنهي داوود و عجبتني جدا و حبيت اسلوبها البوليسي اللطيف المتمصر بتفاصيل مصرية لذيذة 😃❤️
وطبعا ارشحها للقراءة
إقتباس لمسني:
"أن الناس يتغيرون طيلة الوقت، تُغيِّرهم ضغوط الحياة، أو مطاردة الأحلام المستحيلة"