العدد ده رهيب.. كمية أحداث وتشويق حلوة جدا

العدد السابق كانت سهير هيا الراوية لكن هنا لاشين اتولى الحديث وكانت المغامرة الجديدة خاصة به هو ومهاب.

مغامرة جديدة عن الضحاك (شيطان جديد) وأساطير فارسية قديمة ومخلوقات سماوية وحربها مع الشياطين ومغارات في جبال محبوس فيها شياطين بردو 😂

العدد كان مميز بكم الأساطير والحكايات الغريبة اللي ليها علاقة بالحاجات اللي مالهاش تفسير.. مدن الجان مثلا والكائنات السماوية أو الأنوناكي (أسطورة موجود في حضارات قديمة).. و قوة لاشين في مواجهة كل ده..

عجبتني علاقة لاشين ومهاب اللي اتطورت من توتر وخوف وعدم ثقة من ناحية مهاب.. واستهزاء وتقليل من ناحية لاشين، لعلاقة صداقة حلوة أوي ومضحكة أوقات كتير 😂

مهاب شخصيته ظهرت هنا بقوة بعد ما كنت واخده فكرة عنه إنه جبان ورغاي ع الفاضي.. طلع جدع وصاحب صاحبه 😂❤️

ويبدو إن فيه حاجة مميزة خليته مايبقاش تحت تأثير الأوهام اللي لاشين اتأثر بيها.. مهاب ماتخلاش عن لاشين رغم ضعف قدراته المحدودة.

لاشين في العدد ده مميز بإنسانيته اللي بتطغى على الجانب الشيطاني جواه.. في مشاهد زي إحساسه بالراحة وهوا بيصلي.. إحساسه بالنشوة والسعادة من لمة على الفطار في رمضان في بيت سهير رغم استفزاز أسامة المستمر له..

ظهور ما يشبه العائلة بالنسبة له بعيدا عن حبه لسهير، لكنه بقى مهتم وبيحب ناس تانية وعايز يحميهم زي مهاب وشريف وعمر..

التناقض البشري بين بحثه عن الموت عشان يتخلص من الألم ومقاومته لما واجه الموت فعلا وحس إنه قرّب منه أوي عن كل مرة.

حبيت لاشين و مُهاب هنا جدا جدا..

مُهاب طلع من الجزء ده بيتكلم فارسي 😂😂