كتير بنلاقى أعمال أدبية ناجحة اتحولت لعمل فنى لكن نادرا لما نلاقى عمل فنى مأخوذ عن عمل أدبى مجهول ويكون السبب فى تسليط الضوء عليه وان القراء يتعرفوا على التحفة الجميلة ديه,وده دور مهم للفن ورد على اللى بيحصر الفن فى أعمال البلطجة والاسفاف وتحميله أسباب انهيار القيم المجتمعية اللى ليها مليون سبب أضعفهم واللى ملوش صاحب الفن وعلشان كده الكل بيهاجمه ،لأن محدش يقدر يواجه نفسه بالاسباب الحقيقية.
ونرجع تانى للمذكرات اللى معانا مذكرات المعلم عبد العزيز النص هى فى العموم مسلية وجميلة والممتع فيها أنها مكتوبة بالعامية بتاعت زمانها زمن العشرينات واللى أغلب مصطلحاته غير متداولة لكن مفهومة.
المسلسل واخد تفاصيل الشخصيات زى الكتاب الحقيقى مع زيادة لزوم الحبكة الدرامية.
الجميل برده ان الكتاب ده بيأكدلى وجهة نظرى بأنى ضد كل واحد بيهاجم الكتاب الشباب مهما كان اللى بكتبوه ضعيف او غير مفيد او حتى تجارى ولا يحوى اى قيمة,المهم ان الكل يكتب ويستمر فى الكتابة.
كتاب مثل مذكرات عبد العزيز النص صدر بشكل تجارى بحت من كاتبه اللى كان كتب قبله مذكرات عن فتوة ,يعنى بالبلدى كده الناشر كان عامل كتاب عن عبده موته وبعده عن نشال تقريبا كده كوكتيل محمد رمضان لان ده اللى بيشد الناس وده الشغل اللى بيبع,ومع ذلك لا المجتمع انهار ولا قيم المجتمع والاسرة اللى ملهاش كتالوج راحت فى داهية.
وبعد مرور قرن من الزمن يعاد اكتشاف العمل الادبى ليكون مثير لنا لاسباب كتير منها اللغة اللى فقدناها وعرض للمرحلة التايخية والكساد اللى حصل بعد الحرب العالمية وفكر الناس فى الوقت ده.
العمل رغم بساطته لكنى سعدت بيه وبالاحتفاء بيه
حقيقى شكرا لأحمد امين وكل ممثل بيحاول يقدم عمل متميز