"كما يليق بأب يحاول"
القراءة الأولى - وغالبًا الأخيرة - للكاتب، اللي نجح ببراعة في إنه يخليني أدمج بين خيال روايته وواقع مجتمعنا!
قبل ما أقرأ الرواية دي كنت فاكرة إني بميل للروايات الحزينة طالما نهاياتها مبهجة، لكن هنا أنا قرأت أحداث بشعة وأملي في إن النهاية تهون كل اللي قرأته للأسف اتبخر لما شفت النهاية البائسة اللي اتكتبت!
لظروف شخصية العمل أخد مني يومين ونص، لكن هو في الحقيقة يخلص في جلسة واحدة كئيبة قاتمة ربما لولا حرمة الانتحار لكان الفعل التاني للقارئ بعد فعل القراءة مباشرة!
السرد العظيم اللي رافقني في أغلب صفحات العمل والأسلوب المدروس اللي اتصاغ بيه أجبروني أتخيل أحداث العمل كاملة بدون رغبتي في تخيلها من الأصل!
الحوار المدمج بين الفصحى والعامية، أو زي ما منة صاحبتي بتقول ؛ حوار المثقفين، كان بيقحمني في المشاهد غصب عني!
في معلومات عظيمة في أكتر من مجال خدمت العمل وبينت هو قد إيه متعوب عليه، لكن في بعض المشاهد استشعرت فيها إساءة دينية غير مقصودة، بالإضافة لإظهار الموسيقى على أنها علاج للروح رغم حُرمتها، حيث قيل على لسان البطل ❞ على الأقل كنت سألجأ إليها في كل مواقف الخذلان والضعف وتخلي الحياة عني❝، وكان أولى من ده إنه يلجأ إلى المولى سبحانه وقرآنه الكريم.
الحبكة المتقنة دي رغم جنون الفكرة خلتني أسأل نفسي في نهاية العمل.. يا ترى لو ده حقيقة، مين هيقدر يساعد!
يقول الكاتب/
❞أحيانًا، تكافئ الحياة الطيبين بقص شريط العمر سريعًا!❝
#ريڤيو_بس_مش_ريڤيو.
#زينب_إسماعيل.