رواية سيريالية سوداء.
الجانب النفسي في الرواية دي كان قوى جدًا، رسم الخوف والحب والغضب والكراهية وحالة الفقدان بعد الاستقرار، كان مرسوم بذكاء فعلًا، ومع فكرة الحبكة نفسها الغريبة اللي جوا الرواية دي، دي نقطة عجبتني اوي فعلًا.
وعجبني حقيقي صناعة الشخصيات، وان في حاجات اتناقشت في الرواية مشفتش حتى الآن رواية عربي تناولتها، زي مرض Tourette Syndrome، اللي بيحصل في الجهاز العصبي.
ونقطة ان في ناس فعلًا مبتسمعش الموسيقى أو اللحن، في ناس في المجمل مبتسمعش اي صوت في دماغها أو تتخيل او تفكر بصوت جوا دماغها. دماغها ساكتة طول الوقت، يعني لو دندنت هتضطر تدندن بصوت، لما بتقرأ الكتب بتقراها كلام على ورق مبتتخيلش اي حاجة فيها😀.
الرواية من ضمن الحاجات اللي شدتني ليها بردو انها بتعرض الطبقات المختلفة من الشخصيات والاماكن اللي ممكن تمر بيها في حياتك اليومية من غير ما تاخد بالك عمقها، الشوارع الصغيرة جوا الشوارع الكبيرة والجماعات السرية وسط الناس اللي رايحة وجاية، والاحداث الغريبة اللي بتحصل وسط دورة احداث المجتمع العادي. طبقات الحياة تحت طبقات الحياة .
الرواية جميلة جدًا وحبيتها جدًا الحقيقة واتحطت ضمن مفضلاتي.