"وكلنا يسعى إلى إغلاق كل علاقة مواربة، أو وضع نهاية لكل حدث مبتور. كل ما تريدينه يا ابنتي هو إغلاق مناسب لصفحة «عادل» هذا. الصدأ قد أكل رسوماتي مع مرور السنوات لأنني طيلة الوقت كنت أغطيه بالألوان ولا أفكر أبدا في إزالته. صدأ الروح يثقلها فتكبلك وتبقيك للأبد في هاوية أحزانك."

طيب انا مش حابة اتكلم الرواية بتحكي عن ايه، عشان انا بقالي حبه مش ببص علي ملخص الكتب الي انا بقراها وده ادي اني بتفاجئ مفاجات لطيفة جدأ لذلك حابة اشجع الكل يعمل زيي.. وبناءأ عليه خلينا نخش بالتفصيل انا ليه عجبتني الرواية..

اولاً: رتم الأحداث: الراوية احداثها بتدور في اكتر من زمن وفي اكثر من مكان ومع اكتر من شخصية لكن الكاتبة بتمكن قدرت انها تمسك بخطوط القصة في ايديها بطريقة محيت عامل الملل من بابه لأنك هوبا فجأة بتنط من زمن لزمن، من مكان لمكان، ومن شخصية لشخصية مع استكمال القصة الي بتترسم قدامك حته حته مع كل شخصية بطريقة عظمه لكنها سلسة في نفس ذات الوقت مما محي وبشده عامل الملل من الموضوع وخلاني بمنتهي الاريحية كلت الرواية في يومين لأني كنت هفطس واعرف ايه الي هيحصل لأبطال العمل الي بقراه

ثانياً: الوصف: اسمحوا لي هنا ارفع القبعة للكاتبة الي عرفت بمهارة انها توصل من خلال الوصف صورة القصة الي بتتحكي من اول الشخصيات الي الاماكن الي الحقبات الزمنية وصلتني كلها وبشده مش بس مع الشخصيات السعيده لكن مع الشخصيات المقبضة والشريرة وحتي مع الشخصيات المقهورة.. ديه حاجة ساهمت انها ربطتني جدا بالشخصيات المعروضة وخلتني مش بس اتفاعل معاهم لكني احبهم واخاف عليهم كأنهم عشرة..

وديه بيوديني لتالت واهم نقطه بالنسبة لي وهي الشخصيات: الشخصيات يا جماعة معمولها تطور بشكل قمة في الصياعة مما يعطيك القدرة علي رؤية الشخصيات وهي بتتعملق او بتنهار في تطورها، حاجة كده شغل فنادق ويخليك في الاخر ياما عايز تنط في كرش الشخصية الي قدامك ياما عايز تقوم تحضنها وتحميها من العالم المليئ بالوحوش الي بره دول علي رأي اخونا باسل الخياط.. انا كسارة كان لسان حالي بعد ما خلصت اني عايزة "توماسينو" في حياتي وهو احد الشخصيات الاساسية من كتر ما وقعت في غرام تطور ونقاء الشخصية..

اخيرا وليس اخرأ: القفلة: انا بشكر الكاتبة علي ان القفلة الحمد لله ماكنتش كئيبة ولكن مفرحة لأن العمل كان ضلمة وفيه كم مهول من التشوه النفسي لذلك قفلته بطريقة عادلة ومفرحة عملت توازن للعمل ككل..

الحقيقة شابو للكاتبة لأعطاءنا عمل مشوق، مكتوب حلو، مترابط وواقف علي رجله وبيطرح موضوع جديد بطريقة فريش ومثيرة للأهتمام.. ربنا يكرمك لأنك شجعتني ارجع اخلص روايات تاني..

#سو_ريفيو لرواية صدأ 5 من 5